Ваеначальнікі Беларусі і Ірана абмеркавалі інфармацыйнае ўзаемадзеянне
14 жніўня, Позірк. “Пытанні ўзаемадзеяння ў інфармацыйнай сферы” абмеркавалі 13 жніўня на сустрэчы ў Мінску начальнік галоўнага ўпраўлення ідэалагічнай работы Міністэрства абароны Беларусі генерал-маёр Леанід Касінскі і кіраўнік дэпартамента сродкаў масавай інфармацыі Генеральнага штаба Узброеных сіл Ірана Маджтаба Абдалмалекі.
Як адзначае прэс-служба беларускага абароннага ведамства, “у першы дзень візіту госці з Ірана наведалі тэлекампанію [Мінабароны] “ВаенТВ”, а таксама пабывалі з экскурсіяй у Беларускім дзяржаўным музеі гісторыі Вялікай Айчыннай вайны”.
Распачаты візіт Іранскай дэлегацыі стаў трэцім, ажыццёўленым па лініі абаронных ведамстваў дзвюх краін, за апошнія два тыдні.
7 жніўня паведамлялася пра перамовы камандуючага ВПС і войскамі СПА Беларусі Андрэя Лук’яновіча, якія прайшлі ў Тэгеране, і камандзіра ВПС Ірана Хаміда Вахедзі.
31 ліпеня дэлегацыя Міністэрства абароны і падтрымкі Узброеных сіл Ірана, якая знаходзілася ў Мінску, абмеркавала з беларускімі калегамі перспектывы супрацоўніцтва ў сферы інжынернага забеспячэння.
16 траўня ў Міністэрстве абароны Беларусі ўпершыню з моманту ўстанаўлення беларуска-іранскіх дыпадносін (18 сакавіка 1993 года) быў акрэдытаваны ваенны аташэ пры пасольстве Ірана ў Расіі і Беларусі (па сумяшчальніцтве) капітан першага рангу Рэза Хасраві Магадам.
2 траўня стала вядома, што ў Тэгеране завяршыліся камандна-штабныя вучэнні “Пояс бяспекі 2024”, у якіх бралі ўдзел беларускія вайскоўцы.
27 красавіка міністр абароны Беларусі Віктар Хрэнін на сустрэчы з іранскім калегам Махамадам Рэзай Ашціяні заявіў пра гатоўнасць Беларусі “развіваць і ўмацоўваць” супрацоўніцтва з Тэгеранам ва ўмовах міжнародных санкцый. Аштыяні ў сваю чаргу заявіў, што Іран і Беларусь “падзяляюць погляды па асноўных рэгіянальных і міжнародных праблемах і заўсёды падтрымлівалі пазіцыі адзін аднаго”. Ён падкрэсліў “высокі патэнцыял” дзвюх краін “у вайсковым і абаронным сектарах”, адзначыўшы “гатоўнасць Тэгерана да больш цеснага супрацоўніцтва з Мінскам”.
Бягучы візіт праходзіць на фоне пагроз Тэгерана ў адрас Ізраіля адпомсціць за забойства аднаго з лідараў палестынскай групоўкі ХАМАС Ісмаіла Ханіі. Ён удзельнічаў у цырымоніі інаўгурацыі прэзідэнта Ірана 30 ліпеня і быў ліквідаваны ў ноч пасля яе. Іран усклаў адказнасць на Ізраіль.