РФ праз Беларусь спрабавала абысці санкцыі на пастаўкі аўтазапчастак ва Украіну — Кіеў

14 жніўня, Позірк. Аб удзеле “беларускіх падстаўных кампаній” у схемах па абходзе Расіяй санкцый паведаміла 13 жніўня Дзяржаўнае бюро расследаванняў Украіны.

Пастаўкі 23 тон аўтазапчастак расійскага канцэрна “ГАЗ” на суму каля 5,7 млн ​​грыўняў (прыкладна 138 тыс. даляраў) выявілі супрацоўнікі ДБР сумесна з Кіеўскай мытняй год таму.

“З мэтай абыходу санкцый прадстаўнікі краіны-агрэсара планавалі пастаўляць кантрабандную прадукцыю ў нашу краіну праз трэція краіны. Спачатку тавар афармляўся на беларускія падстаўныя кампаніі, пасля адпраўляўся еўрапейскім кампаніям, якія нібыта афіцыйна экспартавалі прадукцыю ва Украіну”, — гаворыцца ў рэлізе.

Здзелка была раскрытая падчас спробы растаможыць тавары ў Кіеве. У ходзе праверкі суправаджальных дакументаў устаноўлена, што запасныя часткі пастаўляліся па дагаворы з аплатай у расійскіх рублях. Канчатковым атрымальнікам сродкаў “з’яўляецца камерцыйная структура, банкаўскі рахунак якой адкрыты ў краіне-агрэсары”.

Кантрабандная партыя аўтазапчастак была канфіскавана і пазней перададзена Узброеным сілам Украіны.

У студзені ДБР паведамляла, што на патрэбы ВСУ былі перададзены 26 тон металічнай прадукцыі, якая належала беларускай кампаніі. Кошт металу ацанілі ў больш як 61 млн долараў.

Актывы беларускіх юрыдычных асоб Кіеў стаў забіраць у сувязі з роляй афіцыйнага Мінска ў развязанай Расіяй вайне супраць Украіны ў 2022 годзе.