У ліпені продажы “БелДжы” на рынку РФ выраслі на 15%

14 жніўня, Позірк. Беларуска-кітайскі брэнд “БелДжы” (BelGee) у ліпені 2024 года прадаў на расійскім рынку 3.742 новыя легкавыя аўтамабілі, што на 15,1% больш, чым у чэрвені (3.250), вынікае з праведзенага “Позіркам” аналізу даных кансалтынгавай кампаніі “АСМ-холдынг” (РФ).

У студзені было прададзена 527 аўтамабіляў, у лютым — 1.065, сакавіку — 2.752, красавіку — 3.020, траўні — 3.601, чэрвені — 3.250.

У ліпені “БелДжы” заняў 9-е месца сярод усіх прадстаўленых у РФ марак, доля рынку склала 2,8%.

Агулам за сем месяцаў 2024 года на рынку РФ рэалізавана 17.957 аўтамабіляў гэтага вытворцы (9-е месца; доля рынку 2,1%).

Цяпер у Расіі прадаецца толькі адна мадэль “БелДжы” — кросовер X50, створаны на аснове Geely Coolray.

Беларуская аўтамабільная асацыяцыя прызнала гэты аўтамабіль найлепшым у 2023 годзе ў катэгорыі SUV (ад англ. sport utility vehicle — “спартыўна-утылітарны аўтамабіль”).

На расійскім рынку таксама прадстаўленая кітайская марка Geely (зборка ажыццяўляецца ў тым ліку на заводзе “БелДжы”). У ліпені было прададзена 13.198 аўтамабіляў, што забяспечыла ёй 4-е месца ў рэйтынгу продажаў (9,8%), за сем месяцаў — 83.015 (9, 8%).

Завод “БелДжы” быў адкрыты 17 лістапада 2017 года ў Барысаўскім раёне (Мінская вобласць). Цяпер яго акцыянерамі з’яўляюцца Рэспубліка Беларусь і кітайскія кампаніі Zhejiang Jirun Automobile, CITICC International Investment Limited, Shenzhen Shentou Investment.