15 жніўня, Позірк. Рэальныя наяўныя грашовыя даходы насельніцтва (даходы з улікам інфляцыі) у студзені — чэрвені 2024 года павялічыліся на 9,6% (за месяц гэты паказчык не змяніўся) у параўнанні з аналагічным перыядам 2023-га, вынікае з паведамлення Нацыянальнага статыстычнага камітэта.
У агульным аб’ёме грашовых даходаў аплата працы займае 65% (месяцам раней — 64,6%), даходы ад прадпрымальніцкай і іншай дзейнасці, якая прыносіць даход, — 7,8% (7,9%), трансферты насельніцтву (пенсіі, дапамогі, стыпендыі і інш.) — 22,3% (22,4%), даходы ад уласнасці і іншыя даходы — 4,9% (5,1%).
Паводле звестак Белстата, у 2023 годзе рэальныя даходы выраслі на 6,3% (пры плане ўладаў 4,1%), у 2022-м было адзначана скарачэнне на 3,6% (пры плане павялічыць іх на 2%).
Намінальная налічаная сярэдняя заработная плата работнікаў Беларусі ў чэрвені 2024 года склала 2.270 рублёў — на 50,8 рубля больш (+2,29%), чым у траўні (2.219,2). У чэрвені 2023-га яна была на ўзроўні 1.927,1 рубля (у гадавым вымярэнні рост на 17,79%).
Спажывецкія цэны ў ліпені 2024 года выраслі на 0,03%, з пачатку года — на 3,4%, у гадавым выражэнні (да ліпеня 2023-га) — на 5,5%.
Паводле найважнейшых прагнозных (дэ-факта планавых) параметраў развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%.
