У чарзе на мяжы з Польшчай сабралася 90 аўтобусаў — ДПК

20 жніўня, Позірк. Чэргі транспарту захоўваюцца на ўсіх напрамках руху з Беларусі ў краіны Еўрасаюза, на мяжы з Польшчай у пункце пропуску Брэст (з польскага боку — Цярэспаль) па стане на 18:00 сабралася 90 аўтобусаў, вынікае з даных, апублікаваных на сайце Дзяржаўнага пагранічнага камітэта (ДПК).

Пры гэтым у 17:00 быў зафіксаваны рэкорд у гэтым пункце пропуску — 92 аўтобусы.

У 10:00 на ўчастку Брэст — Цярэспаль стаяла 76 аўтобусаў.

Калі афармленне аднаго аўтобуса будзе займаць у сярэднім 30 хвілін (звычайна 45–60 хвілін), чаканне на мяжы складзе каля 45 гадзін.

На 18:00 у пункце пропуску Брэст знаходзілася 570 легкавых аўтамабіляў (560 на 17:00, 550 на 10:00).

ДПК адзначае, што праз названы пункт за 24 гадзіны ў Польшчу прайшло 30% транспарту ад нормы.

На літоўскім памежным пераходзе Мядзінінкай (Каменны Лог) на 18:00 было 40 легкавых аўтамабіляў (40; 20), на Шальчынінкаі (Беняконі) — ніводнага (10; 20). Літоўскія службы аформілі 35% і 73% аўто ад сутачнай нормы. Чаргі аўтобусаў няма.

Па стане на 18 гадзін перад пунктам пропуску Патэрніекі (Грыгораўшчына) на ўезд Латвію сабралася 675 грузавікоў (675; 670). Паводле даных ДПК, праз пагранпераход на сумежную тэрыторыю за 24 гадзіны прайшло 56% велікагрузаў.

Менш за ўсё фур за суткі прайшло праз літоўскі Мядзінінкай (Каменны Лог) — 13% ад нормы. На 18:00 праходжання мяжы чакала 610 грузавікоў (610 на 17: 00), у Беняконях — 690 (700), Казловічах (з польскага боку — Кукурыкі) — 100 (100).

Аб затрымках міжнародных пасажырскіх рэйсаў паведамляе ў спецыяльным тэлеграм-канале філіял “Аўтобусны парк № 5” прадпрыемства “Мінсктранс”. На яго ўжо падпісалася больш за 13,7 тыс. чалавек.

20 жніўня прэс-сакратар Міністэрства замежных спраў Анатоль Глаз заявіў, што суседнія з Беларуссю краіны ЕС закрываюць пункты пропуску, уводзячы ўсё больш абмежаванняў: “Дастаткова ўспомніць, што з чэрвеня 2024 года літоўскія мытнікі канфіскоўваюць у грамадзян Беларусі, Літвы і трэціх краін, уключаючы дзяцей, прадукты харчавання, лекі і іншыя тавары для асабістага карыстання пры ўездзе ў Літву або транзіце праз літоўскую тэрыторыю. Да правозу дазволеныя толькі 0,5 літра пітной вады і толькі ў адкрытай ўпакоўцы! Здзекі над грамадзянамі на мяжы працягваюцца і па гэты дзень”.

Па ініцыятыве суседніх краін “зачыненыя амаль усе памежныя пераходы на мяжы з Беларуссю”, што “змушае людзей прастойваць у доўгіх чэргах”, адзначыў Глаз.

Закрыццё сумежных пунктаў пропуску з беларускім бокам звязана з міграцыйным крызісам на мяжы Беларусі і краін ЕС, які працягваецца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Пасля вынясення палітычна матываванага прысуду журналісту Анджэю Пачобуту 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца). Улады Польшчы прама заяўлялі, што менавіта з вызваленнем палітвязня можа быць звязана адкрыццё пунктаў пропуску.

Пры гэтым пытанне поўнага закрыцця мяжы з Беларуссю “датычыцца двухбаковых адносін паміж краінамі”, польскі бок чакае ад Мінска супрацоўніцтва па раней агучаных патрабаванням: спыненне міграцыйнага крызісу, вызваленне Пачобута і выдача забойцы сяржанта Матэвуша Сітэка. Пра гэта ў эфіры “Radio ZET” заявіў міністр унутраных спраў і адміністрацыі Польшчы Томаш Семоняк.