Праваабаронцам вядома пра вызваленне 22 з 30 памілаваных палітвязняў

22 жніўня, Позірк. Праваабаронцам вядома пра вызваленне 22 палітвязняў у рамках указа аб памілаванні, паведамляе ініцыятыва Dissidentby.

Абвешчаныя імёны некаторых вызваленых: Ксенія Луцкіна, Васіль Бераснеў, Ала Зуева, Вольга Стаброўская, Вольга Новікава, Ірына Санкоўская, Кацярына Леў, Наталля Пятровіч, Тамара Каравай, Святлана Палуэктава, Яўген Чуміла.

Указ аб памілаванні 30 асоб, асуджаных за злачынствы “пратэстнай накіраванасці”, Аляксандр Лукашэнка падпісаў 16 жніўня. У ліку памілаваных 14 жанчын і 16 мужчын, “некаторыя з іх маюць сур’ёзныя захворванні”, “ёсць асобы пенсійнага ўзросту”, гаварылася ў паведамленні прэс-службы Лукашэнкі.

Сцвярджалася, што “ўсе яны прызналі віну, шчыра раскаяліся ў зробленым і ўзялі абавязацельства весці правапаслухмяны лад жыцця”. Кантроль за “выкананнем такіх абавязацельстваў” на даручэнне Лукашэнкі “забяспечыць Міністэрства ўнутраных спраў”.

На 22 жніўня праваабарончая супольнасць прызнае палітвязнямі 1.358 чалавек. У рэальнасці іх значна больш.