Максімальны ўзровень пажарнай небяспекі па паўднёвым усходзе Беларусі абвешчаны на 10 верасня

7 верасня, Позірк. Папярэджанне пра максімальны ўзровень пажарнай небяспекі ў Гомельскай і Магілёўскай абласцях, абвешчанае Міністэрствам па надзвычайных сітуацыях на 7–9 верасня, цяпер распаўсюджваецца і на 10 верасня.

У гэты дзень, паводле інфармацыі ведамства, магчымае ўзнікненне пажараў у прыродных экасістэмах. Жыхарам краіны рэкамендавана сярод іншага не хадзіць у лясы, не разводзіць вогнішчы і не спальваць смецце на садовых участках і лецішчах побач з лясамі.

Чакаецца, што практычна па ўсёй Беларусі дзённая тэмпература паветра 10 верасня складзе 23–28 градусаў цяпла (Віцебская вобласць — 23–27 градусаў, Мінск — 24–26 градусаў).

Раней МНС папярэдзіла, што 7–9 верасня ў Гомельскай і Магілёўскай абласцях могуць узнікнуць пажары ў прыродных экасістэмах з распаўсюдам агню на населеныя пункты, лініі электраперадачы і сувязі.