13 верасня, Позірк. Праваабаронца і журналіст Сяргей Сыс абвешчаны ў міждзяржаўны вышук у межах крымінальнай справы, узбуджанай у дачыненні да ўдзельнікаў двух выпускаў тэлешоў “План: Б” на тэлеканале “Белсат”, паведаміў праваабарончы цэнтр “Вясна”.
Справа, аб узбуджэнні якой тэлеканал паведаміў напярэдадні, тычыцца выпускаў ад 25 сакавіка і 1 красавіка паводле ч. 2 арт. 3614 (садзейнічанне экстрэмісцкай дзейнасці) КК, па справе праходзіць больш за дзясятак чалавек.
Раней паведамлялася, што апошнія месяцы да сваякоў і родных падазраваных прыходзяць следчыя, цікавяцца месцазнаходжаннем удзельнікаў праграмы, апытваюць суседзяў, праводзяць іншыя працэсуальныя дзеянні. Вядома таксама аб некалькіх ператрусах.
Адным з фігурантаў новай крымінальнай справы, як адзначае “Вясна”, узбуджанай супраць тых, хто даваў інтэрв’ю СМІ, унесеным у спіс “экстрэмісцкіх фармаванняў” стаў аршанскі праваабаронца і рэдактар партала Orsha.eu Ігар Казмерчак, які таксама абвешчаны ў вышук.
Сыс і Казмерчак з’ехалі з Беларусі ў 2021 годзе.
Тэлеканал “Белсат” створаны для вяшчання на Беларусь у 2007 годзе на падставе дагавора паміж МЗС Польшчы і вяшчальнікам TVP. У лістападзе 2021 года беларускія ўлады прызналі тэлеканал “экстрэмісцкім фарміраваннем”. За супрацу з ім журналісты пераследуюцца ў крымінальным парадку. Найбольш вядомы — кейс Кацярыны Андрэевай (Бахвалавай), якая была прыгаворана спачатку да двух, а затым да васьмі гадоў пазбаўлення волі.
