Ціханоўская наведвае Іспанію

2 кастрычніка, Позірк. 1–3 кастрычніка Святлана Ціханоўская знаходзіцца з візітам у Іспаніі, паведамляе прэс-служба дэмакратычнага лідара.

Запланаваны выступ палітыка на панэлі “Беларусь: маўклівае супраціўленне” Форуму Ла-Тоха* разам з былым вярхоўным прадстаўніком ЕС па замежных справах і палітыцы бяспекі Жазэпам Барэлем.

Ціханоўская правядзе двухбаковыя сустрэчы з прадстаўнікамі іспанскага палітычнага кіраўніцтва, дзе абмяркуе адкрыццё місіі дэмсіл ў Мадрыдзе, далейшы ўдзел Іспаніі ў Міжнародным гуманітарным фондзе дапамогі былым палітзняволеным, пытанні легалізацыі і дакументаў для беларусаў, узмацненне санкцыйнага ціску на рэжым Аляксандра Лукашэнкі, прыцягненне вінаватых у рэпрэсіях да адказнасці.

Таксама гаворка пойдзе аб падтрымцы палітычных зняволеных, рэабілітацыі дзяцей беларусаў, былых палітвязняў і беларускіх добраахвотнікаў ва Украіне.

Дарадца Ціханоўскай па дыпламатычных пытаннях Дзяніс Кучынскі напярэдадні абмеркаваў праблемы легалізацыі беларусаў у Іспаніі з дэлегацыяй камітэта па міжнародных справах Кангрэса дэпутатаў гэтай краіны. Сустрэча адбылася ў літоўскай сталіцы.

7 красавіка падчас візіту Ціханоўскай у Іспанію ўжо было анансавана адкрыццё офіса дэмакратычных сіл Беларусі ў Мадрыдзе.

Ціханоўская наведвала сталіцу Іспаніі ў чэрвені 2025 года.

* Foro La Toja — штогадовы міжнародны форум для дыскусій і дэбатаў пра будучыню ліберальнай дэмакратыі, геапалітыку і эканамічнае супрацоўніцтва. Названы ён у гонар іспанскага вострава Ісла-дэ-ла-Тоха ў правінцыі Пантэведра (Галісія), дзе традыцыйна праходзіць яго асноўная сесія.