“Экстрэмісцкім фарміраваннем” прызнаны адукацыйны праект “Адукаванка”

18 верасня, Позірк. Камітэт дзяржбяспекі 28 жніўня прызнаў “экстрэмісцкім фарміраваннем” праект “Адукаванка”, вынікае з пераліку, апублікаванага на сайце Міністэрства ўнутраных спраў.

Згодна з абноўленым спісам, да “фарміравання” прылічаныя сайты adukavanka.org, adukavanka.by, старонкі праекта ў “Інстаграме” і “Фэйсбуку”, ютуб-канал, а таксама тэлеграм-каналы adukavanka, adukavanka_habits, adukavanka_lang, adukavanka_plc.

Акрамя гэтага, згаданыя тэлеграм-боты праекта: adukavanka_bot, adukavanka_talkbot, adukavanka_talaka_bot, adukavanka_feedback_bot, adukavanka_support_bot, adukavanka_goals_bot і закрытая тэлеграм-група “Адукаванка. Метадкабінет настаўнікаў Беларусі”.

Датычнымі да “фарміравання” названыя Кацярына Куксо і Алена Мельчанка.

“Нам сумна, што рабіць адукацыю лепшай — экстрэмісцкая дзейнасць у Беларусі. Мы застанемся вернымі сваім ідэалам і марам, нягледзячы на цэтлікі, якія на нас вешаюць. І дакладна ведаем, што крутая адукацыя робіцца мазгамі, а не дручкамі. Мы за прымірэнне беларусаў. Варожасць яшчэ ніводнае грамадства не рабіла лепшым”, — так пракаментавалі рашэнне КДБ у тэлеграм-канале праекта.

“Адукаванка” — некамерцыйная грамадзянская ініцыятыва, якая займаецца пытаннямі ўдасканалення адукацыі. Сярод іншага праект прапануе педагогам экспрэс-курсы, канструктары ўрокаў, навучальныя чат-боты і карысныя матэрыялы для запампоўкі.