Дэлегацыю Мінабароны Беларусі азнаёмілі з ходам размініравання Нагорнага Карабаха

10 кастрычніка, Позірк. Дэлегацыю Міністэрства абароны Беларусі ў Азербайджане азнаёмілі з ходам размініравання Нагорнага Карабаха, вынікае з паведамлення Мінабароны Азербайджана.

Візіт праходзіць “у адпаведнасці з планам двухбаковага супрацоўніцтва на 2024 год, падпісаным паміж міністэрствамі абароны Азербайджана і Беларусі”. Мінск аб ім не паведамляе.

Беларуская дэлегацыя наведала Упраўленне міжнароднага ваеннага супрацоўніцтва Мінабароны Азербайджана.

Начальнік галоўнага ўпраўлення інжынерных войскаў Анар Керымаў “праінфармаваў гасцей аб працы па размініраванні тэрыторый, вызваленых пасля перамогі ў Айчыннай вайне, здабытай пад кіраўніцтвам Ільхама Аліева” (так улады афіцыйна называюць ваенныя дзеянні восенню 2020 года, якія прывялі да аднаўлення кантролю Баку над значнай часткай Нагорнага Карабаху і іншымі тэрыторыямі. — “Позірк”.).

Беларуская дэлегацыя азнаёмілася з узорамі ўзбраення, боепрыпасаў і ваеннай тэхнікі, якія знаходзяцца на ўзбраенні інжынерных падраздзяленняў і інжынерным гарадком на тэрыторыі воінскай часці.

Аляксандр Лукашэнка 15 траўня гэтага года накіраваўся з дзяржаўным візітам у Азербайджан, 17 траўня ён наведаў Нагорны Карабах.

Спачатку ён прыляцеў у горад Фізулі, які знаходзіцца пад кантролем Баку з кастрычніка 2020 года. У суправаджэнні прэзідэнта Ільхама Аліева Лукашэнка “азнаёміўся з новым аэрапортам”, гаварылася ў паведамленні яго прэс-службы.

Паведамлялася таксама пра “трактарную тэхніку, падораную гораду” Лукашэнку.

16 траўня падчас перамоваў у Баку Лукашэнка прапанаваў Аліеву садзейнічанне ў аднаўленні тэрыторый Нагорнага Карабаха.

Афіцыйны Мінск актыўна наладжвае адносіны з Азербайджанам, які фактычна з’яўляецца сапернікам Арменіі — саюзніка Беларусі па Арганізацыі Дагавора аб калектыўнай бяспецы (АДКБ).

Увосень мінулага года Азербайджан правёў у Нагорным Карабаху “антытэрарыстычныя мерапрыемствы лакальнага характару”, у выніку якіх рэгіён цалкам перайшоў пад кантроль Баку. Кіраўніцтва непрызнанай Нагорна-Карабахскай Рэспублікі (НКР) аб’явіла аб спыненні існавання самаабвешчанай дзяржавы з 1 студзеня 2024 года.

Арменія, якая падтрымлівае НКР, раскрытыкавала АДКБ за адсутнасць падтрымкі ў вайне з Азербайджанам за Нагорны Карабах і фактычна згарнула свой удзел у дзейнасці арганізацыі.

З Ерэванам у Мінска адбываюцца трэнні.

13 чэрвеня 2024 года прэм’ер-міністр Арменіі Нікол Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Мінску знаходзіцца Лукашэнка. Кіраўнік армянскага ўрада сказаў пра гэта ў кантэксце заяў Лукашэнкі аб карабахскім канфлікце на сустрэчы з прэзідэнтам Азербайджана Ільхамам Аліевым у сярэдзіне траўня. У той жа дзень пасол Арменіі быў выкліканы ў Ерэван для кансультацый.

У адказ Беларусь адклікала для кансультацый свайго амбасадара Аляксандра Канюка. Пры гэтым МЗС заявіў, што Мінск не мае намеру “пагаршаць адносіны з Ерэванам, колькі б армянскае кіраўніцтва да гэтага ні падштурхоўвалі знешнія гульцы”.

21 жніўня дэмакратычныя сілы Арменіі запатрабавалі ад уладаў краіны “неадкладна разарваць дыпламатычныя адносіны з Беларуссю да зняцця дыктатара Лукашэнкі з пасады”. З гэтым і іншымі палітычнымі патрабаваннямі іх прадстаўнікі выйшлі да беларускага пасольства. Прадстаўнікі партыі “У імя Рэспублікі” закідалі дыпмісію яйкамі, памідорамі і бульбай.

Падзеі ля будынка пасольства Беларусі пачалі развівацца пасля інтэрв’ю Лукашэнкі дзяржаўнаму тэлеканалу РФ “Расія”, у якім ён раскрытыкаваў курс армянскіх улад на збліжэнне з Захадам.

У той жа дзень у беларускі МЗС быў выкліканы часовы павераны ў справах Арменіі ў Мінску Нарак Ціратуран.

Пазней Канюк вярнуўся ў Ерэван.

12 верасня Лукашэнка выказаў меркаванне, што ў пагаршэнні адносін з Арменіяй віны Беларусі няма.

2 кастрычніка міністр замежных спраў краіны Арарат Мірзаян заявіў, што Ерэван замарозіў членства ў Арганізацыі Дагавора аб калектыўнай бяспецы (АДКБ) і не мае намеру вяртацца да адносін, якія існавалі да карабахскага канфлікту.