17 кастрычніка, Позірк. Палітычнымі вязнямі прызнаныя яшчэ чатыры чалавекі, цяпер іх у Беларусі 1.292, паведамляе праваабарончы цэнтр “Вясна”.
Статус палітвязняў атрымалі прыгавораныя да пазбаўлення волі за “абразу прэзідэнта” (арт. 368 КК) і “абразу прадстаўніка ўлады” (арт. 369 КК) Юрый Бандарэнка (тэрмін — 1,5 года), Вячаслаў Мурноў (2 гады) і Андрэй Рэбякоў (2 гады).
Палітвязнем таксама прызнаны Кірыл Вевель, узяты пад варту ў рамках крымінальнай справы паводле арт. 361 КК (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь).
Праваабаронцы заклікалі ўлады Беларусі “неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны”.
Заяву падпісалі “Вясна”, Офіс па правах людзей з інваліднасцю, “Прававая ініцыятыва”, Lawtrend.
