У Брэсце асудзілі 14-ю групу за ўдзел у пратэстах у жніўні 2020 года

12 лістапада, Позірк. У Брэсце асудзілі 14-ю групу за ўдзел у пратэстах у жніўні 2020 года.

6 лістапада суд Ленінскага раёна прызнаў вінаватымі жыхароў абласнога цэнтра Артура Трушко, Вадзіма Кутасевіча і Аліну Новікаву паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх), паведамляе праваабарончы цэнтр “Вясна”.

Справу разглядаў суддзя Дзмітрый Шурын.

Трушко і Кутасевічу прызначына 1,5 года пазбаўлення волі ў калоніі ва ўмовах агульнага рэжыму, Новікавай — 2 гады абмежавання волі без накіравання ў папраўчую ўстанову адкрытага тыпу.

Грамадзян абвінавацілі ў тым, што яны 10 і 11 жніўня 2020 года “выкрыквалі лозунгі і дэманстравалі палотнішча бел-чырвона-белага колеру”. 

“Вясна” адзначае, што вядома ўжо мінімум пра 70 чалавек, якіх асудзілі паводле арт. 342 КК за ўдзел у акцыях 10-11 жніўня 2020 года ў Брэсце.

Па самай масавай у гісторыі Беларусі “карагоднай справе” раённыя суды абласнога цэнтра прыгаварылі да розных тэрмінаў яшчэ больш за 130 чалавек.

13 верасня 2020 года ў Брэсце ўдзельнікі акцыі пратэсту супраць фальсіфікацыі вынікаў прэзідэнцкіх выбараў перакрылі рух транспарту на скрыжаванні бульвараў Касманаўтаў і Шаўчэнкі з праспектам Машэрава, спявалі песні і вадзілі карагоды. Пратэстоўцаў упершыню ў Беларусі разагналі з дапамогай вадамётаў, а неўзабаве распачалі крымінальную справу, якую мясцовыя жыхары называюць “карагоднай”.

Паводле падлікаў праваабаронцаў, абвінавачаныя асуджаныя сумарна не менш як на 125 гадоў абмежавання волі без накіравання ў папраўчую ўстанову адкрытага тыпу, 90,5 года — з накіраваннем, 13 гадоў і 8 месяцаў пазбаўлення волі.