13 лістапада, Позірк. Спынена схема дастаўкі з Еўрасаюза ў Беларусь і Расію псіхатропных рэчываў, паведамляе прэс-служба Міністэрства ўнутраных спраў.
Адзначаецца, што “супрацоўнікамі наркакантролю [МУС] Брэстчыны сумесна з калегамі з Брэсцкай мытні і расійскімі паліцэйскімі затрыманыя арганізатар незаконнага бізнесу і пяцёра яго змоўшчыкаў, у Падмаскоўі — атрымальнік тавару, грамадзянін РФ”.
Паводле даных ведамства, выяўлена і канфіскавана 225 кг псіхатропу 4-СМС. Падрабязнасці МУС не прыводзіць, анансуючы адпаведныя “навіны”, верагодна, у дзяржСМІ. Міністэрства называе гэта “журналісцкім расследаваннем”.
Паводле інфармацыі МУС, за 9 месяцаў 2024 года ў Беларусі органамі крымінальнага пераследу было канфіскавана 1.336 кг псіхатропных рэчываў, што больш, чым у 4 разы перавышае аналагічны паказчык папярэдняга года. Большасць з гэтага аб’ёму канфіскавана мытнымі і памежнымі органамі.
