Праваабаронцы: Пры зборы подпісаў за Лукашэнку на грамадзян ціснуць
19 лістапада, Позірк. Пры зборы подпісаў падчас бягучай выбарчай кампаніі прыцягваецца адміністрацыйны рэсурс, а таксама ўжываюцца традыцыйныя метады ціску: пагрозы звальнення, высялення з інтэрната і інш. Пра гэта гаворыцца ў заяве юрыстаў кампаніі “Праваабаронцы за свабодныя выбары”.
На адным з прадпрыемстваў начальства пагражае праблемамі тым, хто не паставіў подпіс у падтрымку вылучэння кандыдатам у прэзідэнты Аляксандра Лукашэнкі, паведамілі крыніцы праваабарончага цэнтра “Вясна”. Работнікаў “запалохваюць магчымымі праверкамі подпісаў у спісах, але не ўдакладняюць, якімі наступствамі для іх гэта скончыцца”, аднак папярэджваюць, што “калі знойдуць подпіс, пакінуты ў падтрымку іншых кандыдатаў, то не падоўжаць кантракт”.
На думку юрыстаў кампаніі, выбарчы працэс “ужо на ранніх стадыях праходзіць ва ўмовах наўмыснага і паслядоўнага парушэння прынцыпу свабоды волевыяўлення грамадзян”. Сярод іншага ўлады выкарыстоўваюць “практыкі ціску, запалохвання і прамога ўплыву на волю выбаршчыка”, што з’яўляецца інструментам для ўтрымання ўлады Аляксандрам Лукашэнкам.
Юрысты падкрэсліваюць, што Лукашэнка “па-ранейшаму не мае намеру прытрымлівацца агульнапрынятых і абавязковых стандартаў правоў чалавека і правядзення выбараў у прыватнасці”. Яны таксама ўпэўненыя, што выбары 2025 года нельга называць свабоднымі.
“Ва ўмовах дэмакратыі выбары дазваляюць людзям рэалізаваць сваё права на ўдзел у кіраванні дзяржавай. Лукашэнка наўмысна адыходзіць ад патрабаванняў Міжнароднага пакта аб грамадзянскіх і палітычных правах, бо ён ведае, што не будзе абраны на сумленных і свабодных выбарах”, — гаворыцца ў заяве.
14 лістапада Лукашэнка сцвярджаў, што за вылучэнне яго кандыдатам у прэзідэнты сабрана 700 тыс. подпісаў. Згодна з Выбарчым кодэксам, для ўдзелу ў выбарах прэзідэнта неабходна сабраць не менш за 100 тыс. подпісаў.
Юрысты кампаніі “Праваабаронцы за свабодныя выбары”, каментуючы названую Лукашэнкам лічбу, не выключылі маніпуляцый падчас падліку подпісаў і прызнання іх дакладнымі.
Сёмыя выбары прэзідэнта прызначаныя на 26 студзеня 2025 года.
Лукашэнка знаходзіцца ва ўладзе з 1994 года. З 1996 года ніводная выбарчая кампанія ў Беларусі не была прызнаная незалежнымі назіральнікамі транспарэнтнай і адпаведнай дэмакратычным стандартам.