У Воранаўскім раёне памежнікі затрымалі двух уладальнікаў беспілотнікаў

27 лістапада, Позірк. Двух мясцовых жыхароў, якія валодалі беспілотнымі лятальнымі апаратамі (БЛА), затрымалі 26 лістапада вайскоўцы Лідскага пагранатрада каля райцэнтра Воранава (Гродзенская вобласць) пры сілавой падтрымцы АМАП УУС Гродзенскага аблвыканкама, паведамляе прэс-служба Дзяржаўнага пагранічнага камітэта.

У аднаго мужчыны беспілотнік мультыротарнага тыпу, пульт кіравання да яго і акумулятарныя батарэі знайшлі па месцы жыхарства, у іншага БЛА з пультам кіравання — у гаражы ў Лідзе (Гродзенская вобласць).

Коптары і камплектуючыя канфіскаваныя і дастаўленыя ва ўпраўленне Лідскага пагранатрада для правядзення далейшага разбору. У дачыненні да мужчын распачаты адміністрацыйны працэс за парушэнне памежнага рэжыму.

Паводле звестак памежнай службы, з пачатку года толькі лідскія памежнікі канфіскавалі ў грамадзян мінімум 14 беспілотнікаў.

Трое мужчын з беспілотнікам самалётнага тыпу і катапультай саматужнай вытворчасці былі затрыманыя 12 лістапада за 14 км ад літоўскай мяжы ў Пастаўскім раёне (Віцебская вобласць).

Брэсцкія памежнікі ўвечары 5 лістапада затрымалі трох мужчын, у якіх былі выяўленыя БЛА мультыротарнага тыпу і шэсць акумулятарных батарэй.

11 кастрычніка быў затрыманы жыхар аграгарадка Доцішкі Воранаўскага раёна (Гродзенская вобласць), у яго доме знойдзены БЛА саматужнай вытворчасці

Папярэдні вядомы выпадак меў месца 29 верасня таксама ў Воранаўскім раёне.

Супрацоўнікі Лідскага пагранатрада 11 верасня затрымалі двух мужчын з беспілотнымі лятальнымі апаратамі паблізу мяжы з Літвой.

У ноч на 11 верасня на мяжы з Польшчай “з прыцягненнем АМАП” былі затрыманыя (https://pozirk.online/be/news/104468/) два жыхары Брэсцкай вобласці, у якіх, паводле заявы Дзяржпамежкамітэта, былі канфіскаваныя самаробны БЛА самалётнага тыпу з парашутам, прызначаныя для запуску апарата тросы, чатыры акумулятарныя батарэі, цеплавізар і “таварна-матэрыяльныя каштоўнасці”.

4 верасня нелегалізаваны беспілотнік быў знойдзены ў раёне аграгарадка Путрышкі (Гродзенскі раён).

1 красавіка ўступіў у сілу ўказ ад 25 верасня 2023 года № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”, якім забараняецца ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.

Акрамя таго, незаконнае ўтрыманне і выкарыстанне беспілотнікаў у памежнай зоне альбо памежнай паласе з’яўляюцца парушэннем памежнага рэжыму і цягнуць адміністрацыйную адказнасць (арт. 24.19 КаАП прадугледжвае штраф да 50 базавых адзінак — да 2.000 рублёў).