Беларуска спрабавала ўвезці “для асабістага карыстання” 120 кг лекаў і шпрыцаў у чатырох валізках

27 лістапада, Позірк. 120 кг лекавых сродкаў і ін’екцыйных шпрыцаў мела намер завезці “для сябе” 38-гадовая грамадзянка Беларусі, якая прыбыла ў Нацыянальны аэрапорт Мінск авіярэйсам са Стамбула. Груз яна спакавала ў чатыры валізкі, паведаміў Дзяржаўны мытны камітэт (ДМК).

З такім багажом для перасячэння мытнай мяжы жанчына абрала “зялёны калідор”, тым самым заявіўшы пра адсутнасць тавараў, якія падлягаюць абавязковаму пісьмоваму дэклараванню. “Лагічна, што супрацоўнікі Мінскай рэгіянальнай мытні такі аб’ёмны багаж надгледзелі”, — адзначаецца ў паведамленні.

На думку мытні, такая партыя не магла быць аднесена да тавараў для асабістага карыстання і падлягала абавязковаму дэклараванню з прадастаўленнем усіх неабходных для перамяшчэння праз мяжу дакументаў. “Аднак грамадзянка сцвярджала, што лекі набыла выключна для асабістага карыстання. Усё, што яна змагла падаць з дакументаў, — гэта выпіску па найменні і кошце некаторых медыкаментаў”, — адзначае мытня.

Падкрэсліваецца, што са 170 прэпаратаў, якія ўвозяцца, толькі сем афіцыйна зарэгістравана ў Дзяржаўным рэестры лекавых сродкаў Рэспублікі Беларусь.

У дачыненні да грамадзянкі Мінская рэгіянальная мытня пачала адміністрацыйны працэс па ч. 4 арт. 15.5 КаАП (недэклараванне і прадастаўленне недакладных звестак аб таварах у буйным памеры). Ёй пагражае штраф да 30% кошту прадмета адміністрацыйнага правапарушэння, які склаў 320 тыс. рублёў, паведаміў ДМК.