Літоўскія памежнікі затрымалі беларуса з падробленымі правамі кіроўцы

11 снежня, Позірк. Літоўскія памежнікі на прапускным пункце Мядзінінкай (з беларускага боку — Каменны Лог) затрымалі 31-гадовага грамадзяніна Беларусі з падробленымі правамі кіроўцы, паведаміў вечарам 10 снежня партал L24.lt са спасылкай на Службу аховы дзяржмяжы.

Паведамляецца, што мужчына ехаў у аўтобусе, які рухаўся з Вільнюса ў Мінск. Беларус, што мае дзейны да чэрвеня 2025 года дазвол на жыхарства ў Літве, падчас праверкі паведаміў памежнікам, што працуе кіроўцам грузавіка. Яго папрасілі паказаць пасведчанне кіроўцы, прадэманстраваны дакумент выклікаў у памежнікаў падазрэнні.

У выніку грамадзянін Беларусі прызнаўся, што набыў правы праз інтэрнэт “у тэрміновым парадку”, заплаціў за іх 350 еўра. Дакумент патрэбны быў яму, каб уладкавацца ў Літве на працу кіроўцам-дальнабойшчыкам.

Дата затрымання не паведамляецца. Разам з тым заяўлена, што на выходных суд пастанавіў узяць беларуса пад варту на два месяцы. Распачатае дасудовае расследаванне па факце “падробкі дакумента або валодання падробленым дакументам”. Мужчыну пагражае арышт ці турэмнае зняволенне на тэрмін да 4 гадоў.