Белстат: Рэальныя даходы насельніцтва за год выраслі на 9,5%

15 студзеня, Позірк. Рэальныя наяўныя грашовыя даходы насельніцтва (даходы з улікам інфляцыі) у студзені — лістападзе 2024 года павялічыліся на 9,5% у параўнанні з аналагічным перыядам 2023-га, вынікае з паведамлення Нацыянальнага статыстычнага камітэта.

У агульным аб’ёме грашовых даходаў аплата працы займае 65,5% (за 10 месяцаў — 65,6%), трансферты насельніцтву (пенсіі, дапамогі, стыпендыі і інш.) — 22% (21,9%). Долі даходаў ад прадпрымальніцкай і іншай дзейнасці, якая прыносіць даход, а таксама ад уласнасці і іншых даходаў за месяц не змяніліся — 7,8% і 4,7% адпаведна.

Паводле звестак Белстата, у 2023 годзе рэальныя даходы выраслі на 6,3% (пры плане ўладаў 4,1%), у 2022-м было адзначана скарачэнне на 3,6% (пры плане павялічыць іх на 2%).

Намінальная налічаная сярэдняя заработная плата работнікаў Беларусі ў лістападзе 2024 года склала 2.331,8 рубля — на 31,6 менш (-1,3%), чым у кастрычніку (2.363,4), сведчыць праведзены “Позіркам” аналіз даных Нацыянальнага статыстычнага камітэта.

Па ўзроўні намінальнага заробку традыцыйна лідзіруе Менск — 3.112 рубля (у кастрычніку — 3.149,4; -1,2%). У Мінскай вобласці ён склаў 2.251,9 (2.406,2; -6,4%), Гомельскай — 2.097,5 (2.134,6; -1,7%), Гродзенскай — 2.097,9 (2.111,9; -0,7%), Брэсцкай — 2.086,5 (2.110,9; -1,2%), Віцебскай — 1.964,9 (1.988,6; -1,2%), Магілёўскай — 1.958,9 (1.974,6; -0,8%).

Паводле звестак Белстата, спажывецкія цэны ў лістападзе 2024 года выраслі на 0,3%, з пачатку года — на 4,6%, за 12 месяцаў (лістапад да лістапада) — на 5,5%. За ўвесь мінулы год інфляцыя склала 5,2%.

Паводле найважнейшых прагнозных (дэ-факта планавых) параметраў развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%.