Кабанчук назваў хлуснёй словы Вальфовіча пра нібыта існыя планы захапіць прыгранічча Беларусі

16 студзеня, Позірк. Дзяржсакратар Савета бяспекі Беларусі Аляксандр Вальфовіч замест таго, каб “прызнаць рэальныя праблемы, якія стаяць перад краінай”, займаецца “стварэннем міфаў пра “захоп раёнаў” і “замежных баевікоў”, заявіў прадстаўнік па абароне і нацыянальнай бяспецы Аб’яднанага пераходнага кабінета (АПК) Вадзім Кабанчук.

“Гэта не што іншае, як хлусня, скіраваная на апраўданне існай паліцэйскай дзяржавы, — цытуе палітыка прэс-служба АПК. — А таксама гэта “падкормліванне” дыктатара дэзінфармацыяй, каб сілавікі маглі атрымліваць сабе зорачкі на пагонах”.

Кабанчук лічыць заяву Вальфовіча “часткай прапагандысцкай гульні”.

“Мы бачым, што напярэдадні важных для рэжыму так званых электаральных падзей, спецслужбы перыядычна эксплуатуюць тэмы, звязаныя з устойлівасцю, бяспекай, стабільнасцю, спакоем і тым, як “знешнія ворагі” імкнуцца ўсё гэта разбурыць”, — адзначыў ён.

Паводле слоў Кабанчука, АПК працуе “выключна ў інтарэсах беларускага народа”, і яго мэта заключаецца ва “ўсталяванні дэмакратыі, законнасці і прававой дзяржавы ў Беларусі”. “І відавочна, што дэмакратыя, законнасць і правая дзяржава з’явяцца не ў межах аднаго-двух раёнаў, а на тэрыторыі ўсёй Беларусі”, — дадаў палітык.

У апублікаваным 16 студзеня інтэрв’ю выданню “СБ. Беларусь сегодня“ Вальфовіч, як некалі Аляксандр Лукашэнка, абвінаваціў праціўнікаў у намеры захапіць частку Беларусі.

“Паводле наяўных звестак, разглядаецца магчымасць задзейнічання <…> экстрэмісцкіх фарміраванняў ва ўзброенай аперацыі па захопе аднаго або некалькіх прыгранічных раёнаў Беларусі, абвяшчэнні гэтай тэрыторыі “свабоднай” і ўводу туды заходнімі краінамі нейкага “міратворчага” кантынгенту”, — заявіў дзяржсакратар Савета бяспекі.