Ціханоўская абмеркавала сітуацыю з палітвязнямі з намеснікам дзяржсакратара ЗША

17 студзеня, Позірк. Дэмакратычны лідар Святлана Ціханоўская абмеркавала 16 студзеня сітуацыю з палітвязнямі ў Беларусі з намеснікам дзяржсакратара ЗША Куртам Кэмпбэлам у гутарцы па тэлефону, паведамляе яе тэлеграм-канал.

“Дыялог датычыўся апошніх навінаў пра беларускіх палітвязняў і магчымых крокаў, якія могуць спрыяць іх вызваленню”, — гаворыцца ў паведамленні.

Акрамя гэтага бакі абмеркавалі працяг Стратэгічнага дыялогу паміж беларускімі дэмакратычнымі сіламі і Вашынгтонам, супрацоўніцтва з новай адміністрацыяй ЗША, пашырэнне міжнароднага ўзаемадзеяння, праграмы абменаў і стыпендыяў для беларусаў.

4 снежня 2024 года Кэмпбэл заявіў у відэазвароце да ўдзельнікаў другога стратэгічнага дыялогу беларускага дэмруху з урадам ЗША ў Вільнюсе пра далейшую падтрымку дэмакратычных памкненняў беларусаў.

У верасні мінулага года Ціханоўская сустрэлася з Кэмпбэлам у Вашынгтоне, дзе яны абмеркавалі “шляхі вызвалення палітвязняў у Беларусі”.

Перад тым палітык сустракалася з ім у Вільнюсе. Намеснік дзяржсакратара ЗША запэўніў яе, што Вашынгтон працягне падтрымліваць беларускі народ і дэмакратычную супольнасць.

На вечар 16 студзеня ў Беларусі 1.245 чалавек прызнана праваабарончай супольнасцю палітвязнямі.