24 студзеня, Позірк. Перад выбарамі ўлады спрабуюць схаваць маштабы рэпрэсій, заявіў старшы даследчык Цэнтра новых ідэй, былы дырэктар Інстытута сацыялогіі Нацыянальнай акадэміі навук Беларусі Генадзь Коршунаў на прэзентацыі аналітычнай справаздачы “8-ы Беларускі трэкер перамен” 24 студзеня.
Для пацвярджэння сваёй думкі Коршунаў згадаў спыненне публікацыі відэазапісаў з затрыманымі, няпоўны расклад судоў у электроннай базе Вярхоўнага суда.
“Асуджаным па палітычных артыкулах не выдаюць копій пратаколаў, што пазбаўляе іх права на абскарджванне. Актывістаў выклікаюць на допыты з папярэджаннем, што разгалошванне гэтых фактаў прывядзе да крымінальных спраў”, — сказаў Коршунаў.
Паводле яго слоў, усе гэтыя меры сведчаць пра тое, што “рэжым павялічвае ціск, адначасова імкнучыся схаваць яго маштабы”, ствараючы ілюзію стабільнасці.
