Тры чалавекі загінула на пажарах у Беларусі за мінулыя суткі

26 студзеня, Позірк. Тры чалавекі загінула на пажарах у Беларусі за мінулыя дзяжурныя суткі (з 6:00 25 студзеня да 6:00 26 студзеня), сведчыць аператыўная зводка Міністэрства па надзвычайных сітуацыях.

Два трагічныя выпадкі адбыліся ў Брэсцкай вобласці: пры тушэнні пажару ў жылым доме ў вёсцы Луткі (Столінскі раён) ратавальнікі знайшлі цела мужчыны 1985 года нараджэння, у вёсцы Кормуж (Лунінецкі раён) — мужчыны 1942 г.н.

Яшчэ адно жыццё агонь забраў у Мінскай вобласці: загінулага мужчыну 1953 г.н. знайшлі ў лецішчы на тэрыторыі садовага таварыства каля вёскі Масцішча (Дзяржынскі раён).

Акрамя таго, у выніку пажару ў кватэры аднапавярховага двухкватэрнага дома ў Барысаве (Мінская вобласць) апёкі атрымалі грамадзянін (1947 г.н.) і яго жонка (1949 г.н.). Паведамляецца, што на іх загарэлася адзенне — у выніку “ўспышкі пароў вадкасці з утрыманнем спірту пры прыгатаванні самагону”. Абодва гаспіталізаваныя.

Ад пачатку года ў Беларусі адбылося 436 пажараў — на 11,9% менш, чым за аналагічны перыяд 2024-га (495). Загінула 63 чалавекі (-18,2%; 77), траўмавана — 40 (-4,8%; 42).