У Беларусі расійскі брэнд зрушыў Geely з першага месца па продажах новых легкавых аўтамабіляў

6 лютага, Позірк. У Беларусі ў студзені 2025 года было рэалізавана 4.299 новых легкавых і лёгкіх камерцыйных аўтамабіляў, гаворыцца ў каментары члена праўлення Беларускай аўтамабільнай асацыяцыі Андрэя Ткачова на сайце БАА.

Паводле яго слоў, адбыўся больш як двухразовы рост продажаў у параўнанні з аналагічным перыядам мінулага года“.

На думку эксперта, на дынаміку рынку станоўча паўплывала як з’яўленне новых мадэляў, так і тое, што па многіх брэндах і мадэлях цэнаўтварэнне ў Беларусі з’яўляецца “адным з найбольш даступных” у параўнанні з іншымі краінамі Еўразійскага эканамічнага саюза.

“На беларускім рынку новы лідар — першае месца па выніках месяца ўпэўнена заняў брэнд LADA”, — паведаміў Ткачоў.

Расійскі брэнд рэалізаваў 1.706 аўтамабіляў (доля рынку склала 39,7%). На працягу апошняга часу безумоўнае лідарства належала брэнду Geely (BelGee).

Важным момантам для рынку новых аўтамабіляў, падкрэсліў прадстаўнік асацыяцыі, стала “рэкордная доля “зялёных аўта”, сумарныя продажы якіх у мінулым месяцы дасягнулі 586 адзінак, што склала 14,2% продажаў у сегменте легкавых аўтамабіляў”.

Ткачоў прагназуе, што ў 2025 годзе “будзе праходзіць трансфармацыя рынку”, якая ўжо “прасочвалася летась і стала відавочнай па выніках студзеня гэтага года”. Гэта азначае, што ўсё больш і больш спажыўцоў у Беларусі будзе рабіць выбар на карысць гібрыдаў і электрамабіляў.

Агульныя дадзеныя па продажах за студзень 2025-га, як і агулам за 2024-ы, у адкрытым доступе не прыводзяцца.

Як стала вядома “Позірку”, традыцыйнае гадавое мерапрыемства БАА па падвядзенні вынікаў за 2024 год пройдзе ў першай палове лютага, дата пакуль не вызначаная.