7 лютага, Позірк. Амбасадар па асаблівых даручэннях МЗС Украіны па Беларусі Ігар Кізім сышоў у адстаўку.
“Сёння, выключна з асабістых прычынаў, я прыняў рашэнне звольніцца з дыпламатычнай службы і пайсці на “заслужаны адпачынак”, — напісаў цяпер ужо экс-дыпламат 7 лютага на сваёй старонцы ў “Фэйсбуку”.
“У кожнага чалавека надыходзіць час, калі ты разумееш, што ўзрост бярэ сваё (Кізіму 63 гады. — “Позірк“.) і ты не можаш цалкам аддавацца сваёй працы. А працаваць па-іншаму я не магу, ды і ў цяперашніх умовах лічу несумленным у дачыненні да службы, якой я прысвяціў амаль усё сваё жыццё”, — адзначыў ён.
Кізім дадаў, што “не мае намеру ўсё кінуць і далучыцца да “канапавых пенсіянераў”, выказаў упэўненасць у тым, што можа прынесці карысць у тых галінах, дзе будуць карысныя яго “досвед і кампетэнцыі”. “Як будзе далей — паглядзім”, — падсумаваў экс-дыпламат.
Раней у гэты дзень інфармагенцтва “Укрінформ” апублікавала інтэрв’ю з Кізімам, у якім той выказаўся ў тым ліку наконт перспектыў украінска-беларускіх стасункаў. Былы спецамбасадар у развітальным паведамленні адзначыў, што расцэньвае гэтае інтэрв’ю “як пэўны вынік сваёй “публічнай” працы на пасадзе, якую цяпер пакінуў”.
Пра тое, што Кізім прызначаны амбасадарам па асобых даручэннях па Беларусі, стала вядома 3 лютага 2024 года.
З 16 лютага 2017 года па 22 чэрвеня 2023 года ён займаў пасаду ўкраінскага амбасадара ў Беларусі. Дыпламат заставаўся ў Мінску нават пасля пачатку поўнамаштабнай вайны РФ супраць Украіны з выкарыстаннем беларускай тэрыторыі.
19 красавіка 2023 года Кізім быў адкліканы ў Кіеў для кансультацый пасля сустрэчы Аляксандра Лукашэнкі з кіраўніком г. зв. “данецкай народнай рэспублікі” Дзянісам Пушыліным. Украінскія ўлады назвалі візіт Пушыліна ў Мінск “спробай легітымацыі гэтага прадстаўніка расійскай акупацыйнай адміністрацыі ў Данецку”. Кізім у Беларусь больш не вяртаўся.
