Украіна дэнансавала пагадненне з Беларуссю аб супрацоўніцтве ў галіне сувязі

11 лютага, Позірк. Урад Украіны прыняў рашэнне аб дэнансацыі двухбаковага пагаднення з Беларуссю аб “прынцыпах супрацоўніцтва і ўмовах узаемаадносін у галіне сувязі”.

Пра гэта ў сваім тэлеграм-канале паведаміў прадстаўнік Кабінета міністраў Украіны ў Вярхоўнай Радзе Тарас Мельнічук.

Пагадненне дзейнічала з 17 снежня 1992 года, было падпісана ў Кіеве.

Пасля пачатку поўнамаштабнай вайны ва Украіне, у якой Беларусь падтрымлівае Расію, Кіеў і Мінск разарвалі мноства дамоўленасцяў аб двухбаковым супрацоўніцтве.

У жніўні 2024 года Украіна выйшла з міжурадавага пагаднення з Беларуссю аб супрацоўніцтве ў галіне ўрадавай сувязі.

19 верасня 2023 года абедзве палаты беларускага парламента прынялі, а Аляксандр Лукашэнка падпісаў закон “Аб прыпыненні дзеяння пагаднення паміж Рэспублікай Беларусь і Украінай аб рэгуляванні працэсу перасялення і абароне правоў перасяленцаў і членаў іх сем’яў”. Дакумент быў падрыхтаваны “ў рамках захадаў у адказ на недружалюбныя дзеянні Украіны ў дачыненні да Рэспублікі Беларусь”, а яго рэалізацыя нібыта “будзе спрыяць абароне нацыянальных інтарэсаў” Беларусі.