28 лютага, Позірк. Латвія, Літва, Польшча і Эстонія накіравалі ў Еўрапейскую камісію дакумент, у якім выкладзеныя дэталі стварэння адзінай лініі абароны на мяжы з Беларуссю і Расіяй, а таксама ўказваюць кошт некалькіх агульнакантынентальных абаронных праектаў, паведамляе Euractiv.
Адзначаецца, што дакумент закліканы паўплываць на распрацоўку так званай “Белай кнігі” аб будучыні абароны блока, у якой, як чакаецца, будуць вызначаныя асноўныя абаронныя праекты, куды еўрапейцы павінны інвеставаць “на дабро ўсіх краін ЕС”.
Разглядаецца пытанне стварэння “Паўночна-ўсходняга памежнага шчыта” (ПУПШ), а таксама агульных запасаў боепрыпасаў, шчыта супрацьпаветранай абароны і забеспячэння бяспекі марской зоны.
Плануецца, што ПУПШ аб’яднае “Усходні шчыт” Польшчы, “Балтыйскую лінію абароны” краін Балтыі і можа ўключыць мяжу Фінляндыі з Расіяй.
Паводле разлікаў Латвіі, Літвы, Польшчы і Эстоніі, неабходныя інвестыцыі для гэтага праекта складуць 8–10 млрд еўра “па доўгім спісе пазіцый”, адзначае Euractiv.
У публікацыі падкрэсліваецца, што “абарона мяжы з Расіяй і Беларуссю мае ключавое значэнне для абароны ЕС”.
Згаданыя чатыры краіны прапануюць Еўракамісіі “прыняць тэрміновыя меры па павышэнні контрмабільнасці, узмацненні паветранага назірання і супрацьпаветранай абароны, электроннай абароны і падводнай бяспекі” іх межаў.
Яны таксама прапануюць краінам ЕС “сумесна інвеставаць у інфраструктуру з умацаваннямі, высокатэхналагічнымі сістэмамі памежнага назірання, магчымасцямі радыёэлектроннай барацьбы, беспілотнікамі і сродкамі процідзеяння беспілотнікам”. Таксама прапануецца выдаткаваць сродкі на стварэнне складоў для захоўвання абсталявання, паліва, боепрыпасаў і выбуховых рэчываў, а таксама на лагістыку для транспарту і сховішчаў.
Паводле меркавання названых краін, агулам ЕС павінен выдаткаваць 100 млрд еўра на павышэнне абараназдольнасці кантынента да 2028 года ў дадатак да нацыянальных інвестыцый. Палова гэтай сумы павінна пайсці на стварэнне запасаў боепрыпасаў і ракет.
