BySol праводзіць збор сродкаў для Ксеніі Луцкіной

4 сакавіка, Позірк. Фонд салідарнасці BySol абвясціў збор сродкаў для былой палітзняволенай, журналісткі Ксеніі Луцкіной, якая была вывезеная з Беларусі.

Запатрабаваная сума складае 7.000 еўра. За першыя гадзіны сабрана 2.900 еўра.

BySol адзначае, што экс-палітзняволеная мае цяжкае захворванне, якое патрабуе лячэння. “Таму мы разлічваем, што большая частка сродкаў пойдзе на медыцыну і яшчэ крыху застанецца для адаптацыі”, — гаворыцца ў тлумачальным паведамленні.

Да жніўня 2020 года Луцкіна працавала ў Белтэлерадыёкампаніі. Пасля прэзідэнцкіх выбараў далучылася да забастоўкі супрацоўнікаў холдынгу, пазней звольнілася і ўвайшла ў асноўны склад Каардынацыйнай рады па ўрэгуляванні палітычнага крызісу. Была затрыманая ў снежні 2020 года.

8 верасня 2022 года Мінскі гарадскі суд прыгаварыў Луцкіну да 8 гадоў пазбаўлення волі паводле ч. 1 арт. 357 Крымінальнага кодэкса (змова або іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам).

У апошнім слове Луцкіна прасіла суд пра “літасць і гуманнасць”, пра “магчымасць вярнуцца ў грамадства і прыносіць яму карысць, выкупіць сваю віну словам і справай”. Яна нагадала пра сваю хваробу — пухліну галаўнога мозгу — і пра тое, што ёй патрэбная медыцынская дапамога на волі.

16 жніўня 2024 года Аляксандр Лукашэнка падпісаў указ аб памілаванні 30 асоб, асуджаных за злачынствы “пратэстнай скіраванасці”. 20 жніўня стала вядома, што Луцкіна на волі.