Ціханоўская возьме ўдзел у пасяджэнні Савета ЕС па агульных пытаннях

17 сакавіка, Позірк. Беларускі дэмакратычны лідар Святлана Ціханоўская на гэтым тыдні наведае Брусель, дзе возьме ўдзел у пасяджэнні Савета ЕС па агульных пытаннях (адна з 10 фармацый Савета Еўрапейскага саюза).

На сваёй старонцы ў сацыяльнай сетцы Х палітык паведаміла, што яна выступіць перад усімі еўрапейскімі міністрамі і сустрэнецца з камісарам па пытаннях пашырэння ЕС Мартай Кос.

“Мы абмяркуем, як разам узмацніць Еўропу і як вывесці Беларусь з вайны. Бо мы ўсе — Еўропа!” — напісала Ціханоўская.

Савет па агульных пытаннях каардынуе падрыхтоўку да пасяджэнняў Савета ЕС, адказвае за шэраг скразных напрамкаў палітыкі. Савет у асноўным складаецца з міністраў па еўрапейскіх справах з усіх дзяржаў — членаў ЕС. Еўрапейскую камісію звычайна прадстаўляюць адпаведныя камісары ​​ў залежнасці ад пытанняў, якія абмяркоўваюцца.

Чарговае пасяджэнне Савета па агульных пытаннях запланаванае на 18 сакавіка. Сярод пытанняў яго парадку дня — падрыхтоўка да пасяджэння Савета ЕС 20–21 сакавіка, дзе сярод іншага будуць абмяркоўвацца сітуацыя ва Украіне і пытанні міграцыі.