У “спіс тэрарыстаў” унесеныя экс-старшыня партыі “Зялёныя” Кучук і яшчэ 11 чалавек (дапоўнена)

18 сакавіка, Позірк. Камітэт дзяржаўнай бяспекі 17 сакавіка ўнёс у спіс “асоб, што маюць дачыненне да тэрарыстычнай дзейнасці”, яшчэ 12 чалавек. Адпаведныя змены адлюстраваныя ў дакуменце, апублікаваным 18 сакавіка ў адмысловым тэлеграм-канале КДБ.

У спіс дададзеныя Мікалай Буневіч, якому высунутыя абвінавачанні паводле арт. 130 і 361 Крымінальнага кодэкса; асуджаныя на невядомыя тэрміны Алег Самародскі (ч. 1 арт. 130, ч. 3 арт. 361, ч. 3 арт. 361¹), Павел Мінчык (арт. 368, 130), Дзмітрый Сідарэнка (арт. 130), Максім Старасценка (арт. 130, 293), Людміла Ясімчык (арт. 130, 368), Алена Марозава (арт. 342, 361, 130), Аляксандр Радрэнка (арт. 130); асуджаныя на розныя тэрміны Аляксей Зачапіла (1,5 гады; арт. 130), Павел Вабішчэвіч (23 гады; арт. 295, 356), Андрэй Зіненка (12 гадоў; арт. 295, 356), а таксама былы кіраўнік дэ-юрэ ліквідаванай Беларускай партыі “Зялёныя” Дзмітрый Кучук.

Летась напрыканцы снежня Мінскі гарадскі суд прыгаварыў Кучука да 6 гадоў пазбаўлення волі паводле ч. 1 арт. 342 і ч. 3 арт. 361 КК.

Суд таксама пастанавіў спагнаць з яго штраф — 500 базавых велічынь (на момант вынясення выраку — 20.000 рублёў).

Палітыка затрымалі 16 лютага 2024 года па дарозе да амбасады РФ у Мінску, каля якой той хацеў ускласці кветкі і запаліць лампадкі ў памяць пра расійскага апазіцыянера Аляксея Навальнага, які памёр у калоніі.

У “спісе тэрарыстаў” 1.364 пазіцыі і 1.260 чалавек, з іх не менш за 567 — грамадзяне Беларусі. Абвешчаным “тэрарыстамі” зняволеным забаронена атрымліваць грашовыя пераводы.

Даведка “Позірку”:

• арт. 130 — распальванне расавай, нацыянальнай, рэлігійнай або іншай сацыяльнай варожасці або варажнечы;
• арт. 293 — масавыя беспарадкі;
• арт. 295 — незаконныя дзеянні ў дачыненні да агнястрэльнай зброі, боепрыпасаў і выбуховых рэчываў;
• арт. 342 — арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх;
• арт. 356 — здрада дзяржаве;
• арт. 361 — заклікі да мер абмежавальнага характару (санкцый), іншых дзеянняў, скіраваных на прычыненне шкоды нацыянальнай бяспецы;
• арт. 361¹ — стварэнне экстрэмісцкага фарміравання або ўдзел у ім;
• арт. 368 — абраза прэзідэнта.