У рамках праверкі боегатоўнасці ваеннаабавязаныя “адбілі ўдар умоўнага праціўніка” — Мінабароны

20 сакавіка, Позірк. У рамках праверкі баявой гатоўнасці ваеннаабавязаныя “адбілі ўдар умоўнага праціўніка” падчас “розыгрышу тактычнага эпізоду”, паведамляе прэс-служба Міністэрства абароны.

У тактыка-спецыяльных манеўрах удзельнічаюць падраздзяленні Ваенна-паветраных сіл і войскаў супрацьпаветранай абароны, удакладняецца ў паведамленні.

Паводле даных ведамства, ваеннаабавязаныя “здзейснілі марш у прызначаныя раёны, падрыхтавалі да працы ўзбраенне і ваенную тэхніку”, а таксама “забяспечваюць функцыянаванне пунктаў кіравання ВПС і войскаў СПА”.

Месца правядзення вучэнняў не ўказваецца.

Адзначаецца, што на палігоне “Брэсцкі” вайскоўцы 38-й Брэсцкай дэсантна-штурмавой брыгады “здзяйсняюць скачкі з парашутам” з верталёта Мі-8МТВ5 6-й механізаванай брыгады, а таксама “адточваюць навыкі кіравання беспілотнымі лятальнымі апаратамі”.

Праверка боегатоўнасці арміі праводзіцца ў Беларусі з 3 лютага. Яе мэтай, як раней адзначала Мінабароны, з’яўляецца праверка здольнасці камандзіраў кіраваць сваімі падраздзяленнямі пры вядзенні абарончага бою.

Для асабістага складу асноўная задача — атрыманне практыкі і ўдасканаленне навыкаў у ходзе правядзення адзіночнай падрыхтоўкі і баявога зладжвання ў складзе падраздзяленняў.

У рамках праверкі боегатоўнасці Узброеных сіл з запасу на зборы выклікана каля 5 тыс. ваеннаабавязаных, паведаміў 5 сакавіка начальнік Генеральнага штаба УС — першы намеснік міністра абароны Павел Муравейка.

Рэжым Аляксандра Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Менск падтрымлівае Крэмль.

У лютым 2022 года ўварванне ажыццёўлена ў тым ліку з беларускай тэрыторыі.