21 сакавіка, Позірк. Палажэнне пра сістэму адмысловага тэлерадыёвяшчання зацвердзіў 21 сакавіка Кабінет міністраў Украіны, паведаміў у сваім тэлеграм-канале прадстаўнік урада ў Вярхоўнай Радзе Тарас Мельнічук.
Паводле яго інфармацыі, дакумент вызначае “асноўныя задачы, механізм функцыянавання сістэмы адмысловага тэлерадыёвяшчання, і парадак яе выкарыстання”.
Сістэма адмысловага тэлерадыёвяшчання прызначаная для “блакавання сігналаў наземнага тэлевізійнага вяшчання і радыёвяшчання ў FM-дыяпазоне радыёчастот”, якія распаўсюджваюцца з тэрыторыі Расіі, Беларусі і Прыднястроўскага рэгіёну Малдовы, а таксама “з тэрыторый, на якіх вядуцца (вяліся) баявыя дзеянні, або з часова акупаваных РФ тэрыторый, вызначаных загадам Мінразвіцця”.
11 лютага ўрад Украіны прыняў рашэнне аб дэнансацыі двухбаковага пагаднення з Беларуссю пра “прынцыпы супрацы і ўмовы ўзаемаадносін у галіне сувязі”.
Пагадненне дзейнічала з 17 снежня 1992 года, было падпісанае ў Кіеве.
У жніўні 2024 года Украіна выйшла з міжурадавага пагаднення з Беларуссю пра супрацу ў галіне ўрадавай сувязі.
19 верасня 2023 года Палата прадстаўнікоў прыняла, Савет Рэспублікі ўхваліў, а Аляксандр Лукашэнка падпісаў закон “Аб прыпыненні дзеяння пагаднення паміж Рэспублікай Беларусь і Украінай аб рэгуляванні працэсу перасялення і абароне правоў перасяленцаў і членаў іх сем’яў”. Дакумент быў падрыхтаваны “ў рамках мер у адказ на недружалюбныя дзеянні Украіны ў дачыненні да Рэспублікі Беларусь”, яго рэалізацыя нібыта “будзе садзейнічаць абароне нацыянальных інтарэсаў” Беларусі.
Пасля пачатку поўнамаштабнай вайны ва Украіне, у якой Беларусь падтрымлівае Расію, Кіеў і Мінск скасавалі шмат дагавораў пра двухбаковую супрацу.
