24 сакавіка, Позірк. На даручэнне Аляксандра Лукашэнкі 24 сакавіка дзяржсакратарыят Савета бяспекі распачаў праверку баявой гатоўнасці Узброеных сіл, вынікае з інфармацыі прэс-службы Міністэрства абароны.
Адзначаецца, што асабоваму складу “адной з вайсковых часцей” належыць выканаць “комплекс мерапрыемстваў па падрыхтоўцы тэхнікі і ўзбраення да выканання вучэбна-баявых задач, у тым ліку ажыццявіць загрузку матэрыяльных сродкаў і ажыццявіць выхад на адзін з палігонаў”.
Далей пройдуць мерапрыемствы па “інжынерным абсталяванні, маскаванні, ахове і абароне ў вызначаным раёне”. Вайскоўцам таксама належыць “выканаць кантрольныя стрэльбы са штатнага ўзбраення”.
Для стварэння абстаноўкі набліжанай да баявой з улікам досведу “сучасных ваенных канфліктаў” (верагодна, гаворка пра вайну РФ супраць Украіны) “спланавана задзейнічанне як ударных, так і выведніцкіх БПЛА, а таксама авіяцыі”.
Мінабароны адзначае, што падчас праверкі запланавана перамяшчэнне вайсковай тэхнікі, таму “магчыма часовае абмежаванне руху грамадзянскага транспарту па дарогах агульнага карыстання і ўчастках мясцовасці”.
Варта адзначыць, што раней праверка боегатоўнасці беларускай арміі была абвешчаная 3 лютага. Пра яе завяршэнне не паведамлялася.
Яшчэ 11 сакавіка дзяржаўныя медыя заяўлялі, што праверка працягваецца, хаця этап, які прайшоў у той дзень на палігоне пад Барысавам (Мінская вобласць), называўся “адным з завяршальных”.
