Мінюст: У Беларусі плануецца змяніць мінімальны памер аліментаў
26 кастрычніка, Позірк. У Беларусі плануецца змяніць мінімальны памер аліментаў, вынікае са слоў намесніка начальніка ўпраўлення прававога рэгулявання і забеспячэння дзейнасці галоўнага ўпраўлення прымусовага выканання Міністэрства юстыцыі Алены Расолькі ў праграме “Cуровы погляд“ на тэлеканале СТБ.
Цяпер ніжняя планка аліментаў прывязаная да бюджэту пражытачнага мінімуму ў сярэднім на душу насельніцтва: “З 1 жніўня па 30 кастрычніка ён устаноўлены на ўзроўні 530 рублёў 37 капеек. Кожны месяц даўжнік абавязаны выплачваць аліменты. Памер залежыць ад яго даходаў. На адно дзіця гэта 25%, на двух і больш дзяцей — 33% і 50% — на трох і больш дзяцей. У цяперашні час у дзяржаўных органах прапрацоўваецца пытанне па карэкціроўцы мінімальнага памеру аліментаў. І, магчыма, найбліжэйшым часам будуць нейкія змены ў гэтым кірунку“.
У 2026 годзе ў органах выканання знаходзілася 105 тыс. выканаўчых вытворчасцяў аб спагнанні аліментаў. З 250 млн рублёў заяўленых патрабаванняў па аліментах спагнана 240 млн, сказала чыноўнік.
Паводле яе слоў, 95% даўжнікоў па аліментах — мужчыны ва ўзросце 30-50 гадоў. З 100 тыс. даўжнікоў “больш за 75 тыс. працуюць афіцыйна і выплачваюць аліменты са свайго заробку“.
“Калі даўжнік не працуе, утварылася запазычанасць па аліментах, то ў такой сітуацыі судовы выканаўца прымяняе комплекс мер, — адзначыла Расолька. — У першую чаргу гэта абарачэнне спагнанняў на грашовыя сродкі, рахункі, дэпазіты, арышт і рэалізацыя ліквіднага маёмасці па месцы жыхарства, а таксама абарачэнне спагнання на транспартны сродак, аб’екты нерухомасці“.
“Ёсць і такія эфектыўныя меры, як абмежаванне даўжніка ў праве на аказанне яму паслугаў сувязі і інтэрнэту, часовае абмежаванне ў праве на кіраванне механічным транспартным сродкам, маламернымі судамі, абмежаванне права на паляванне. Таксама мы ўжываем меру абмежавання ў праве на наведванне ігральных устаноў, у тым ліку віртуальных. Акрамя таго, судовы выканаўца мае права хадайнічаць перад судом аб абмежаванні даўжніка ў праве на выезд за межы краіны“, — заявіла прадстаўнік Мінюста.
Паводле яе слоў, цяпер судовыя выканаўцы працуюць з маёмасцю 5-6 тыс. даўжнікоў.
Калі ўсе механізмы вычарпаныя, то, як заявіла Расолька, “ініцыюецца перад органамі крымінальнага пераследу пытанне аб прыцягненні даўжніка да крымінальнай адказнасці паводле артыкула 174 Крымінальнага кодэкса“ (ухіленне бацькоў ад утрымання дзяцей альбо ад кампенсацыі выдаткаў, затрачаных дзяржавай на ўтрыманне дзяцей, якія знаходзяцца або знаходзіліся на дзяржаўным забеспячэнні). “Сёлета праведзеная праверка ў дачыненні да больш за 2,5 тыс. асоб, і больш за палову з іх прыцягнутыя да крымінальнай адказнасці“, — паведаміла яна.
Артыкул 174 КК прымяняецца найчасцей у дачыненні да абвінавачаных, вынікае са звестак Вярхоўнага суда. У першай палове 2026 года па ёй асуджана 2.534 чалавекі.
