Падоўжана адхіленне беларускіх лёгкаатлетаў ад міжнародных спаборніцтваў

25 сакавіка, Позірк. Міжнародная асацыяцыя федэрацый лёгкай атлетыкі (World Athletics) падоўжыла санкцыі супраць спартсменаў з Беларусі і Расіі.

Рашэнне прынятаt па выніках пасяджэння савета арганізацыі, яго агучыў на прэс-канферэнцыі прэзідэнт World Athletics Себасцьян Коў.

“Савет лічыць бягучыя санкцыі адэкватнымі і не бачыць неабходнасці іх змяняць або дапаўняць, калі толькі сітуацыя не пагоршыцца або не будзе дасягнута мірнае пагадненне [па вайне ва Украіне]”, — сказаў Коў.

Санкцыі прадугледжваюць поўную забарону для беларусаў і расіян удзельнічаць у спаборніцтвах пад эгідай World Athletics. З гэтай прычыны лёгкаатлеты дзвюх краін не змаглі прыняць удзел у Алімпійскіх гульнях 2024 года ў Парыжы. Прадстаўнікі іншых відаў спорту спаборнічалі там у нейтральным статусе.

Акрамя лёгкай атлетыкі, поўная забарона для беларусаў і расіян дзейнічае ў дачыненні да гульнявых і асноўных зімовых відаў спорту.

Абмежаванні ўведзеныя па рэкамендацыі Міжнароднага алімпійскага камітэта (МАК) пасля расійскага ваеннага ўварвання ва Украіну 24 лютага 2022 года. Афіцыйны Мінск падтрымлівае агрэсію РФ у гэтай краіне.

28 сакавіка 2024 года МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах у нейтральным статусе. Шэраг федэрацый выканалі гэту рэкамендацыю.