На паўднёвым усходзе Беларусі цягнік сутыкнуўся з лесавозам, папярэдне, пасажыры не пацярпелі

30 красавіка, Позірк. Пасажырскі цягнік № 752 (Мінск — Гомель) сутыкнуўся з лесавозам 30 красавіка ў 17:55 на паўднёвым усходзе Беларусі, вынікае з паведамлення прэс-службы Беларускай чыгункі.

Адзначаецца, што гэта адбылося “на чыгуначным пераездзе перагона Целуша — Чырвоны Бераг (Бабруйскі раён Магілёўскай вобласці і Жлобінскі раён Гомельскай вобласці адпаведна. — “Позірк”.) участка Асіповічы — Жлобін”.

Светлавая і гукавая сігналізацыя, паводле інфармацыі БЧ, былі спраўныя. Лесавоз, як сцвярджаецца, “парушыўшы правілы дарожнага руху, выехаў на чырвоны сігнал святлафора”.

“На момант здарэння ў цягніку знаходзілася 240 пасажыраў. Паводле аператыўнай інфармацыі, ніхто з іх не пацярпеў. У выніку аварыі пашкоджаныя кабіна электрацягніка, два вагоны і кантактная сетка”, — гаворыцца ў паведамленні.

Рух цягнікоў на пазначаным участку прыпынены.

БЧ, як адзначаецца, “робіць аператыўныя захады па ліквідацыі наступстваў інцыдэнту”, “для дастаўкі пасажыраў да месцаў прызначэння будзе арганізаваны дадатковы цягнік”.