Курс долара 12 траўня адкаціўся да ўзроўню канца ліпеня 2023 года

12 траўня, Позірк. Амерыканская і таксама кітайская валюты патаннелі на таргах Беларускай валютна-фондавай біржы 12 траўня 2025 года.

Курс долара знізіўся да 3,001 рубля (-0,75%; -0,0228). Так нізка гэтая валюта таргавалася каля двух гадоў таму. Па выніках сесіі 28 ліпеня 2023 года каціроўка долара вырасла з 3,0057 да 3,0258 рубля.

Юань патаннеў да 4,1533 рубля за 10 (-0,48%; -0,0202); расійскі рубель — падаражэў да 3,69 за 100 (+0,68%; +0,0248).

Таргі еўра не праводзіліся. 8 траўня каціроўка агульнай еўрапейскай валюты знізілася да 3,39 рубля (-0,29%; -0,01).

На мінулым працоўным тыдні (5–8 траўня) курс долара знізіўся на 0,55% (з 3,0405 да 3,0238 рубля), юаня — на 0,2% (з 4,1818 да 4,1735 за 10), еўра — на 2,94% (з 3,4928 да 3,39); расійскага рубля — вырас на 0,26% (з 3,6557 да 3,6652 за 100).

Афіцыйны курс долара ў Беларусі за першую траціну гэтага года знізіўся на 12,16% (з 3,4735 да 3,0512 рубля). Гэта другі паказчык на тэрыторыі былога СССР, сведчыць праведзены “Позіркам” параўнальны аналіз каціровак цэнтрабанкаў на 31 снежня 2024 года і 30 красавіка 2025-га (па выніках студзеня, студзеня — лютага, студзеня — сакавіка таксама другое месца, -1,73%, -8,54%, -10,25% адпаведна).

У 2024 годзе афіцыйны курс долара ў Беларусі вырас на 9,32% (з 3,1775 да 3,4735 рубля). Гэта чацьверты паказчык на тэрыторыі былога СССР.

У 2023 годзе ў Беларусі было другое месца паводле росту афіцыйнага курсу долара (+16,12%), у 2022-м — трэцяе (+7,39%), у 2021-м — чацвёртае сярод краін на тэрыторыі былога СССР, дзе долар патаннеў (-1,19%), у 2020-м — першае месца ў яго падаражэнні (+22,59%).