У Беларусь прыбыў міністр абароны РФ Белавусаў, праходзіць сустрэча з Лукашэнкам
16 траўня, Позірк. У Беларусь 16 траўня з “працоўным візітам” прыбыў міністр абароны Расіі Андрэй Белавусаў, паведамляе прэс-служба беларускага ваеннага ведамства.
Расійскага чыноўніка сустрэў міністр абароны Беларусі Віктар Хрэнін.
“У Мінску кіраўнік ваеннага ведамства Расіі плануе ўзяць удзел у шэрагу перагавораў”, — гаворыцца ў паведамленні.
Белавусава ўжо прымае Аляксандр Лукашэнка, вынікае з паведамлення неафіцыйнага тэлеграм-канала прэс-службы беларускага палітыка.
Апошні раз Белавусаў быў у Мінску ў канцы кастрычніка 2024 года, калі ў беларускай сталіцы праходзіла сумесная калегія міністэрстваў абароны дзвюх краін. Тады ён сярод іншага заявіў, што РФ гатовая выкарыстаць ядзерную зброю ў адказ на агрэсію супраць Беларусі.
