Праз рамонт у аэрапорце Батумі частку рэйсаў “Белавія” перанакіруюць у Кутаісі

17 траўня, Позірк. Авіякампанія “Белавія” змяняе маршруты асобных рэйсаў у Грузію праз рамонт узлётна-пасадачнай паласы ў міжнародным аэрапорце Батумі, што запланаваны на 20 траўня — 15 чэрвеня.

Паводле інфармацыі прэс-службы нацыянальнага авіяперавозчыка, кампаніі давядзецца “змяніць аэрапорт прылёту для некаторых рэйсаў з Мінска ў Батумі і назад”, іх перанясуць у міжнародны аэрапорт Кутаісі.

“Частка рэйсаў будзе па-ранейшаму выконвацца ў аэрапорт Батумі, цяпер авіякампанія карэктуе расклад па гэтым маршруце”, — гаворыцца ў паведамленні.

Пасажырам, якія ўжо аформілі квіткі, рэкамендавана сачыць за актуальнай інфармацыяй на сайце belavia.by (раздзел “Статус бранявання”).

“Калі вы набылі квіток у/з Батумі, для вашага рэйса зменены аэрапорт прылёту, але вы не гатовыя мяняць маршрут, вы можаце здаць квіткі і вярнуць поўны іх кошт. Просім прабачэння за нязручнасці, якія ўзніклі з прычын, што ад нас не залежаць”, — адзначыў авіяперавозчык.