Большасць грамадзян Польшчы, якія галасавалі ў Мінску, падтрымала Тшаскоўскага, прэзідэнтам стаў яго апанент Наўроцкі

2 чэрвеня, Позірк. Большасць грамадзян Польшчы, якія галасавалі на выбарчым участку ў Мінску, падтрымала ў другім туры выбараў прэзідэнта кандыдатуру мэра Варшавы Рафала Тшаскоўскага, сведчаць даныя польскай Дзяржаўнай выбарчай камісіі (ДВК).

Са 108 чалавек, якія прыйшлі 1 чэрвеня на ўчастак у консульскім аддзеле амбасады Польшчы, за Тшаскоўскага свой голас аддалі 57 (52,78% тых, хто прагаласаваў), за яго апанента прэзідэнта Інстытута нацыянальнай памяці Караля Наўроцкага — 51 (47,22%).

У першым туры 18 траўня на ўчастку ў Мінску галасавала 99 чалавек. Тшаскоўскі набраў 30,3% галасоў, Наўроцкі — 20,2% (іншыя кандыдаты, якія ўдзельнічалі на першапачатковым этапе: Славамір Ментцэн — 20,2%, Гжэгаж Браўн — 9%, Магдалена Беят — 7,07%, Ёана Сэнышын — 4%, Адрыян Зандберг — 4%, Шымон Галоўня — 3,03%, Кшыштаф Станоўскі — 2,02%).

Паводле даных ДВК, прэзідэнцкія выбары выйграў Наўроцкі, які набраў 50,89% галасоў. За Тшаскоўскага прагаласавала 49,11%.

Яўка ў другім туры склала 71,7%.

Падчас перадвыбарнай кампаніі 42-гадовы кансерватар Наўроцкі пазіцыянаваў сябе як абаронцу традыцыйных польскіх каштоўнасцяў. Еўраскептык, падтрымлівае амерыканскіх кансерватараў, у тым ліку прэзідэнта Дональда Трампа.

Наўроцкі будзе займаць пасаду кіраўніка дзяржавы на працягу 5 гадоў, кантралюючы абарону і знешнюю палітыку, маючы права вета на заканадаўчыя акты.