У непагадзь у Гомельскай вобласці адбылося ДТЗ з гібеллю трох чалавек

3 чэрвеня, Позірк. Пра смяротнае дарожна-транспартнае здарэнне ў Жлобінскім раёне (Гомельская вобласць) паведамляе Міністэрства ўнутраных спраў.

52-гадовы кіроўца і два пасажыры аўтамабіля “Рэно” загінулі ў выніку лабавога сутыкнення з грузавіком “Мэрсэдэс”.

Аварыя адбылася 3 чэрвеня каля 17:20 каля вёскі Дубрава. Паводле папярэдняй інфармацыі, кіроўца “Рэно” не даў рады з кіраваннем, выехаў на паласу сустрэчнага руху, дзе здзейсніў сутыкненне.

Яшчэ адна пасажырка “Рэно” дастаўлена ў бальніцу, пра яе стан не паведамляецца.

На месца здарэння паводле распараджэння міністра ўнутраных спраў Івана Кубракова накіраваны начальнік галоўнага ўпраўлення Дзяржаўтаінспекцыі Віктар Ротчанкаў.

Паведамляецца, што на месцы ДТЗ працуюць супрацоўнікі ДАІ, следча-аператыўная група, медыкі і прадстаўнікі МНС.

МУС папярэджвае, што “пры дрэнных умовах надвор’я кіроўцу неабходна выбіраць бяспечную хуткасць, не здзяйсняць неабдуманых манеўраў, выключыць рэзкія рухі стырном, разгоны і тармажэнні”. “Пры пагаршэнні бачнасці ўключайце бліжняе святло фар, вытрымлівайце бяспечную дыстанцыю і бакавы інтэрвал”, — рэкамендуе ведамства.

“Белгідрамет” папярэджваў, што ўдзень 3 чэрвеня “ў паўднёвых раёнах краіны чакаюцца моцныя дажджы, месцамі па Гомельскай вобласці — вельмі моцныя дажджы”. “У перыяд з 14 гадзін 30 хвілін да 19 гадзін па паўднёвым усходзе чакаюцца навальніцы, пры навальніцах месцамі град і шквалістае ўзмацненне ветру парывамі 15–20 м/с. Навальнічная сітуацыя захаваецца да 23 гадзін”, — паведамілі ў арганізацыі. Быў абвешчаны аранжавы ўзровень небяспекі.

Моцны вецер 3 чэрвеня паваліў у Гомельскай вобласці 20 дрэў.