Цягнік Асіповічы — Магілёў спазняецца на дзве гадзіны з-за паломкі ў дарозе

3 чэрвеня, Позірк. Аб паломцы дызель-цягніка № 6588, які накіроўваецца па маршруце Асіповічы — Магілёў, паведамляе Беларуская чыгунка.

З-за няспраўнасці цягнік “спынены на перагоне Друць — Вендрыж”, ён “прыбудзе на канчатковую станцыю са спазненнем прыкладна на дзве гадзіны”, гаворыцца ў паведамленні.

“У сувязі з гэтым цягнік № 880 Салігорск — Магілёў ідзе з затрымкай арыентыровачна на 40 хвілін”, — адзначылі ў БЧ.

Прымаюцца “аператыўныя меры па арганізацыі дастаўкі пасажыраў да месцаў прызначэння і скарачэння часу спазнення названых цягнікоў”, падкрэсліваецца ў рэлізе.

БЧ прынесла прабачэнні пасажырам “за прычыненыя нязручнасці”.

1 чэрвеня паведамлялася аб змене маршруту цягніка Анапа (РФ) — Мінск. Графік руху быў парушаны з-за абвальвання аўтамабільнага моста ў Бранскай вобласці (Расія).