Міністры транспарту 13 краін ЕС абвінавацілі Беларусь і РФ у стварэнні перашкод для працы навігацыйных сістэм

10 чэрвеня, Позірк. Міністры транспарту 13 краін Еўрасаюза заклікалі Еўрапейскую камісію да “неадкладных і скаардынаваных дзеянняў у адказ на перашкоды ў працы глабальных навігацыйных спадарожнікавых сістэм (ГНСС), якія зыходзяць з Расіі і Беларусі”, паведамляе агенцтва BNS.

Адпаведны ліст адрасаваны вярхоўнаму прадстаўніку ЕС па замежных справах і палітыцы бяспекі Кае Каллас, еўракамісарам Андрусу Кубілюсу (па абароне і космасу), Апосталасу Цыцыкастасу (па ўстойлівым транспарце і турызме) ды іншым членам Еўракамісіі.

Міністры падкрэсліваюць, што “з 2022 года ў паветранай прасторы рэгіёну Балтыйскага мора назіраюцца два тыпы перашкод ГНСС — глушэнне і спуфінг (метад маніпуляцыі сігналамі GPS, які дазваляе прыладзе паведамляць ілжывыя каардынаты. — “Позірк”.), што ўяўляе пагрозу для розных відаў транспарта, у прыватнасці грамадзянскай авіяцыі і марскога суднаходства”.

Аўтары ліста лічаць, што “выпадкі перашкод у працы ГНСС з’яўляюцца не выпадковымі інцыдэнтамі, а сістэматычнымі, наўмыснымі дзеяннямі Расіі і Беларусі, якія могуць быць выкарыстаныя ў якасці гібрыднай атакі на стратэгічны радыёспектр, неабходны для сучасных тэхналогій, рэгіянальнай бяспекі і абароненасці, асабліва на транспарце”.

У мэтах падвышэння бяспекі Еўропы міністры таксама заклікалі ЕС “актывізаваць дыпламатычныя намаганні па ліквідацыі перашкод” і “усчыніць ціск на адказныя бакі”, у тым ліку шляхам судовых іскаў супраць адказных асоб і арганізацый, якія маюць дачыненне да наўмыснага ўмяшання ў сігналы ГНСС.

Паведамляецца, што ліст, тэкст якога быў узгоднены на пасяджэнні Савета ЕС па транспарце, тэлекамунікацыям і энергетыцы 5–6 чэрвеня ў Люксембургу, падпісалі міністры транспарта Германіі, Даніі, Італіі, Іспаніі, Латвіі, Літвы, Нідэрландаў, Румыніі, Славакіі, Славеніі, Фінляндыі, Чэхіі і Эстоніі.

“Цяперашняя абстаноўка ў сферы бяспекі патрабуе агульнага адказу на гібрыдныя пагрозы, якія зыходзяць ад варожых рэжымаў, а таксама шчыльнай супрацы для падвышэння гатоўнасці і ўстойлівасці Еўропы. Збоі ў працы сігналаў ГНСС чыняць непасрэдны ўплыў на такія стратэгічныя сектары, як транспарт, энергетыка і тэлекамунікацыі. Каб прадухіліць патэнцыйныя інцыдэнты, мы павінны дзейнічаць хутка і рашуча на ўзроўні Еўрапейскага саюза — не індывідуальна, а скаардынавана”, — прыводзіць BNS заяву міністра транспарту і камунікацый Літвы Эўгеніюса Сабуціса.