У Лёзненскім раёне кіроўца збіў лася, выйшаў на праезную частку і трапіў пад колы аўтамабіля

10 чэрвеня, Позірк. Смяротная аварыя адбылася каля “апоўначы 9 чэрвеня” ў Лёзненскім раёне, на 52-м кіламетры аўтадарогі Р-21 (Віцебск — мяжа РФ), паведамляе Дзяржаўтаінспекцыя Віцебскай вобласці.

Паводле інфармацыі службы, 53-гадовы кіроўца аўтамабіля Hyundai ехаў з боку Віцебска і збіў “дзікую жывёліну, што раптоўна выбегла на праезную частку”, — лася.

“Пасля ўчынення ДТЗ кіроўца выйшаў з аўтамабіля на праезную частку дарогі, дзе на яго быў здзейснены наезд аўтамабілем Kia Sportage, які рухаўся ў сустрэчным напрамку. У выніку аварыі пешаход (гаворка пра кіроўцу Hyundai. — “Позірк”.) ад атрыманых цялесных пашкоджанняў памёр на месцы здарэння”, — гаворыцца ў паведамленні.

Дзяржаўтаінспекцыя заклікала кіроўцаў “быць вельмі пільнымі”, адзначыўшы, што “выбар бяспечнай хуткасці ў раёне ляснога масіву і асцярожнасць пры праездзе небяспечных адрэзкаў дазволяць пазбегнуць ДТЗ”.

Служба таксама заклікала кіроўцаў, “каб пазбегнуць трагічных наступстваў”, пасля абазначэння месца аварыі пакідаць праезную частку.