Дарадца Ціханоўскай абмеркаваў ва ўпраўленні вярхоўнага камісара ААН па правах чалавека становішча беларускіх палітвязняў

2 июля, Позірк. Становішча палітвязняў і магчымыя спосабы іх вызвалення абмеркаваў дарадца Святланы Ціханоўскай па прававых пытаннях Леанід Марозаў ва ўпраўленні вярхоўнага камісара ААН па правах чалавека ў Жэневе, паведаміла прэс-служба дэмлідара.

Асобна Марозаў звярнуў увагу на кейс нобелеўскага лаўрэата Алеся Бяляцкага, які знаходзіцца ў зняволенні. Таксама паведамляецца, што 2 ліпеня ў Жэневе адбылося мерапрыемства, прысвечанае крытычнай сітуацыі з правамі чалавека ў Беларусі. Яно было арганізаванае Літвой і Латвіяй, на ёй таксама прысутнічаў Марозаў.

Паводле прэс-службы Ціханоўскай, “фокус увагі ўдзельнікі скіравалі на пераслед палітвязняў, журналістаў і актывістаў, а таксама транснацыянальныя рэпрэсіі”. Уздымалася пытанне таго, што рэжым усё больш актыўна выкарыстоўвае завочныя суды і міжнародныя ордары, каб запалохваць беларусаў за мяжой.

“Мы заклікаем дэмакратычныя краіны і структуры ААН падтрымліваць працу незалежных экспертаў і выкарыстоўваць усе механізмы адказнасці, каб спыніць гвалт і беспакаранасць. Рэпрэсіі больш не абмяжоўваюцца тэрыторыяй Беларусі. Яны набылі транснацыянальны характар і пагражаюць бяспецы беларусаў і беларусак у Еўропе і за яе межамі”, — падкрэсліў Марозаў.

Ён адзначыў важнасць падтрымкі ўсіх, хто сутыкаецца з рэпрэсіямі, і падзякаваў партнёрам за салідарнасць.

26 чэрвеня на 59-й сесіі Савета ААН па правах чалавека (СПЧ) у Жэневе спецыяльны дакладчык ААН па пытанні аб становішчы ў галіне правоў чалавека ў Беларусі Нілс Муйжніекс падкрэсліў неабходнасць “трымаць сітуацыю з правамі чалавека ў Беларусі на парадку дня ў ААН і іншых рэгіянальных арганізацыях, такіх як АБСЕ, ЕС, Савет Еўропы і іншых”.

Разважаючы пра найбольш эфектыўныя спосабы вызвалення палітвязняў, Муйжніекс заявіў, што ў першую чаргу неабходна “спыніць з’яўленне новых палітвязняў, у адваротным выпадку мы ствараем сітуацыю закладнікаў, якая будзе доўжыцца доўгі час“.