Белгідрамет абвясціў аранжавы ўзровень небяспекі ў Брэсцкай і Гродзенскай абласцях

5 ліпеня, Позірк. Аранжавы ўзровень небяспекі праз спякоту абвешчаны на 6 ліпеня ў Брэсцкай і Гродзенскай абласцях, паведамляе Белгідрамет.

Тэмпература паветра ў гэтых рэгіёнах дасягне ва ўказаны дзень +30–31°С.

У Гомельскай вобласці максімальная тэмпература чакаецца на ўзроўні + 30°С, Магілёўскай, Мінскай і Мінску — +29°С, Віцебскай — +28°С.

На падставе гэтага Міністэрства па надзвычайных сітуацыях выпусціла папярэджанне, у якім пералічаныя фактары небяспекі пры спякоце, а таксама дадзены шэраг рэкамендацый насельніцтву.

Папярэдні раз аранжавы ўзровень небяспекі абвяшчаўся на 3 ліпеня.

У гэты дзень, як паведамляў “Позірк”, у Беларусі быў перакрыты тэмпературны рэкорд дня амаль 90-гадовай даўніны.

У Брэсце паветра прагрэлася да 34,6 градуса вышэй за нуль. На 0,1 градуса перавышаны экстрэмум, які трымаўся з 1938 года (зафіксаваны ў Жыткавічах). Лакальны максімум складаў 32,6 градуса (3 ліпеня 2012 года).

У Пінску ўпаў рэкорд дня, які трымаўся з 1915 года (33,1 супраць 32,6 градуса).

Абнавіліся экстрэмумы ў Гродне (34,5 супраць 29,7 у 1986 годзе), Магілёве (30,8 супраць 30,2 у 2022-м) і яшчэ 20 населеных пунктах.