Расіянін спрабаваў вылецець з Мінска ў Стамбул па надрукаваным на прынтары пашпарце 

16 ліпеня, Позірк. Грамадзянін Расіі затрыманы раніцай 15 ліпеня ў Нацыянальным аэрапорце Мінск пры афармленні рэйса “Мінск — Стамбул“ за “спробу парушэння дзяржаўнай мяжы“, паведаміла прэс-служба Дзяржаўнага памежнага камітэта (ДПК).

Для праходжання памежнага кантролю мужчына прад’явіў “пашпарт грамадзяніна РФ з прыкметамі поўнай падробкі“, “праведзеная спецыяльная праверка паказала, што ўсе старонкі ў дакуменце надрукаваныя на звычайным прынтары“. 

“Акрамя таго, у ходзе разбору ўстаноўлена, што іншаземец невыпадкова спрабаваў вылецець у Турцыю па падробленым пашпарце: ён знаходзіцца ў міждзяржаўным вышуку за крадзеж і дачу хабару. Зламыснік затрыманы і змешчаны ў ізалятар часовага ўтрымання ГУУС Мінгарвыканкама“, — паведаміў ДПК. 

За спробу незаконнага перасячэння мяжы парушальніку пагражае штраф да 100 базавых велічынь (4,2 тыс. рублёў), за падробку дакумента прадугледжана крымінальная адказнасць — абмежаванне волі на тэрмін да двух гадоў.

10 чэрвеня пры афармленні рэйса, які прыбыў са Стамбула, у аэрапорце затрымалі мужчыну “з пашпартам грамадзяніна Расіі, які выклікаў падазрэнне”.

22 траўня пры афармленні рэйса ў Дубай (ААЭ) памежнікі затрымалі мужчыну і дзяўчынку з часткова падробленымі пашпартамі грамадзян Расіі — у дакументах былі замененыя старонкі з усталявальнымі звесткамі.

Высветлілася, што Міністэрства ўнутраных спраў РФ абвясціла мужчыну ў міждзяржаўны вышук — за забойства. Ён таксама быў пазбаўлены бацькоўскіх правоў і не мог пражываць з дзіцем на законных падставах.