Урад зацвердзіў пераносы працоўных дзён на 2026 год

23 ліпеня, Позірк. Пастановай урада ад 22 ліпеня № 397 вызначаныя пераносы працоўных дзён на 2026 год. Пра гэта паведаміла прэс-служба Савета Міністраў.

Згодна з дакументам, працоўны дзень 20 красавіка (панядзелак) пераносіцца на суботу, 25 красавіка. Днямі адпачынку будуць 18 (субота), 19 (нядзеля), 20 (панядзелак) і 21 (аўторак) красавіка 2026 года.

У прэс-службе Міністэрства працы і сацыяльнай абароны адзначылі, што “арганізацыям з улікам спецыфікі вытворчасці (працы) даецца права перанесці працоўны дзень (20 красавіка) на іншы выхадны дзень, які прыпадае на суботу”.

Традыцыйна непрацоўнымі днямі ў 2026 годзе з’яўляюцца: 1 і 2 студзеня — Новы год, 7 студзеня — Раство Хрыстова (праваслаўнае), 8 сакавіка — Міжнародны жаночы дзень, 21 красавіка — Радаўніца ў праваслаўных, 1 траўня — Дзень працы, 9 траўня — Дзень Перамогі, 3 ліпеня — Дзень Незалежнасці, 7 лістапада — Дзень Кастрычніцкай рэвалюцыі, 25 снежня — Раство Хрыстова (каталіцкае).

Як паведамлялася 15 лістапада 2024 года, урад не скарыстаўся магчымасцю зрабіць для грамадзян тыднёвы адпачынак на навагоднія святы. Гэта вынікае з яго пастановы ад 14 лістапада № 839 “Аб пераносе працоўных дзён у 2025 годзе”.

Раман Галоўчанка, які займаў пост прэм’ер-міністра, пазней заявіў, што рашэнне не абвяшчаць 3 студзеня 2025 года выходным днём — найбольш “збалансаванае і аптымальнае” для эканомікі.

“Мы цяпер не ў тых умовах, каб дазволіць сабе такія доўгія канікулы”, — падкрэсліў Галоўчанка.