На рэсурсах брэнда Belaruskicry з’явілася папярэджанне пра прызнанне яго “экстрэмісцкім фарміраваннем”
Сайт брэнда Belaruskicry да і пасля з'яўлення папярэджання
26 ліпеня, Позірк. На інтэрнэт-рэсурсах ювелірнага брэнда Belaruskicry 26 ліпеня з’явілася папярэджанне пра прызнанне яго “экстрэмісцкім фарміраваннем”.
У прыватнасці, на старонках у “Фэйсбуку” і “Інстаграме” размешчанае аднолькавае паведамленне на беларускай мове: “Сёння Belaruskicry прызнаны экстрэмісцкім фарміраваннем у Беларусі. Што гэта значыць: падпіска можа лічыцца ўдзелам у экстрэмісцкай групе, рэпосты і скрыны — падстава для крымінальнай адказнасці, кантэнт у тэлефоне — рызыка затрымання”.
На галоўнай старонцы сайта па-руску сцвярджаецца, што “інфармацыйная прадукцыя Belaruskicry прызнаная экстрэмісцкай”, “кіраўнікі крамы — члены экстрэмісцкага фарміравання”. “Будзьце асцярожныя! Рэкамендуецца адмовіцца ад паслуг гэтага брэнда”, — гаворыцца ў паведамленні (пераклад “Позірку”). Усе старонкі — уключаючы каталог, кантакты, умовы аплаты і дастаўкі — пустыя.
Стыль паведамлення, а таксама дысфункцыянальнасць сайта даюць падставы меркаваць, што рэсурс маглі мадыфікаваць не яго ўладальнікі.
У спісе “экстрэмісцкіх матэрыялаў” на сайце Міністэрства інфармацыі, а таксама пераліку “экстрэмісцкіх фарміраванняў” на сайце МУС няма згадак пра брэнд Belaruskicry або яго рэсурсы.
Аўтарам упрыгожанняў, якія выходзяць пад згаданым брэндам, з’яўляецца беларуска Аляксандра Куркова, якая пакінула радзіму пасля пратэстаў 2020 года.
