За суткі ў Беларусі патанулі тры чалавекі
27 чэрвеня, Позірк. Тры чалавекі патанулі ў Беларусі 26 ліпеня, вынікае са звестак Міністэрства па надзвычайных сітуацыях (МНС) і Беларускага рэспубліканскага таварыства ратавання на водах (ТРВОД).
МНС паведамляе пра гібель на вадзе двух чалавек у Магілёўскай вобласці.
У Бабруйску на рацэ Бярэзіна патануў мясцовы жыхар 2006 года нараджэння. Спасылаючыся на словы відавочцы, ведамства адзначае, што каля 8:35 гадзін “мужчына нырнуў, пасля чаго ўсплыў на паверхні вады”.
“Відавочца дастаў яго на бераг без прыкмет жыцця”, — гаворыцца ў паведамленні.
Падкрэсліваецца, што гібель чалавека адбылася ў месцы, неабсталяваным для купання.
У 18:07 у МНС паступіла інфармацыя аб утапленні чалавека ў рацэ Свіслач каля пасёлка Сасновы Асіповіцкага раёна.
Паводле звестак ведамства, тры чалавекі “паплылі на надзіманым матрацы, на адлегласці каля 15 метраў ад берага адзін нырнуў з матраца і знік пад вадой”.
Узрост загінулага не указаны. Месца для купання таксама не абсталяванае.
ТРВОД паведамляе пра гібель на вадзе мужчыны ў Мінску. Цела вынята са Свіслачы людзьмі, якія “ажыццяўлялі сплаў па рацэ на сапбордах”. “Меркавана мужчына рыбачыў”, — адзначаецца ў паведамленні.
Узрост загінулага не называецца.
Аб гібелі людзей на вадзе паведамляецца рэгулярна.
25 ліпеня, паводле звестак ТРВОД, патанулі тры чалавекі, 24-га — два, 22-га — адзін.
“Позірк” паведамляў, што за выхадныя дні, 19 і 20 ліпеня, у краіне патанулі чатыры чалавекі.
За 18 ліпеня паведамлялася пра ўтапленне аднаго чалавека, 17 ліпеня — двух.
16 ліпеня ТРВОД паведаміў пра ўтапленне за суткі пяці чалавек.
На прэс-канферэнцыі 19 чэрвеня ў Мінску начальнік аддзела цэнтра вадалазна-выратавальнай службы Рэспубліканскага атрада спецпрызначэння “ЗУБР” МНС Андрэй Войцік паведаміў, што з пачатку года да таго дня ад утаплення ў Беларусі загінула 108 чалавек (у тым ліку пяць дзяцей), за аналагічны перыяд 2024 — 109 (таксама пяць).
10 чэрвеня афіцыйны прадстаўнік МНС Яўген Бараноўскі паведамляў, што з пачатку траўня 2025 года ў Беларусі патануў 31 чалавек. За аналагічны леташні перыяд пры купанні патанула 16 чалавек. Такую вялікую розніцу прадстаўнік ведамства звязваў у першую чаргу з умовамі надвор’я, якія “не дазволілі паўнавартасна адкрыць новы купальны сезон”.
16 ліпеня Следчы камітэт паведаміў, што з 1 траўня супрацоўнікі ведамства “выбывалі 44 разы па паведамленні аб утапленні людзей”, сярод загінулых — трое дзяцей.
Паводле даных СК, за першае паўгоддзе ў ваннах патанула трое непаўналетніх, яшчэ адзін загінуў, праваліўшыся ў калодзеж.
